Байыр чедириишкини

Хүндүлүг чаңгыс чер чурттугларым!

Силерге Тыва Республиканың Дээди Хуралының (парламентизиниң) мурнундан Ада-чурт камгалакчыларының хүнү-биле байыр чедирерин чөпшээреп көрүңер!

Февраль 23 – бистиң төөгүвүсте онзагай хүн. Бөгүн бис төрээн чуртувусту хөй-хөй чылдарда камгалап, кадагалап чораан база бо үеге чедир камгалап чоруур российжи шериглеривиске, чурттуң Чепсектиг Күштериниң бүгү хоочуннарынга хүндүткеливис болгаш өөрүп четтириишкинивис илередип турар бис. Шак-ла ындыг чылыг-чымчак сөстерни Ада-чурттуң Улуг дайынының болгаш өске-даа тус чер дайыннарының хоочуннарынга база адрестеп чугаалаалы.

Бодунуң төрээн чуртун, оран-савазын камгалаары дээрге, кандыг-даа кижиниң кол хүлээлгези болур. Ынчангаш февральдың 23 – бүгү улустуң ниити байырлалы болуп турары ол. Ол дээрге күштүг, эрес-маадырлыг, тура-соруктуг кижилерниң хүнү-дүр. Россияның кандыг-даа хамаатызы – шериг постуда турар солдат-даа, азы тайбың амыдыралдың чаяакчызы-даа чүнүң-даа мурнунда бодунуң төрээн чуртунуң камгалакчызы-дыр. Кижи бүрүзү бодунуң күш-ажылы-биле улуг Россияның алдар-адын көдүрүп, күчү-шыдалын тургузуп турар.

Бөгүн Россияның шерии тургустунганындан бээр 106 чыл оюн демдеглеп турар. Төөгүлүг ол чылдарның сөөлгү ийи чылында Донбасс биле Новороссияның девискээрлеринде тускай шериг операциязы чоруп турар. Кызылдан 55-ки тускай мото-адыгжы (даг) бригада ийи чыл дургузунда эрес-маадырлыг чоруун көргүскеш, «Гвардейжи» бедик атты чаалап алды. Тываның чону маадырларывыска чоргаарланыр бис!
Бо кайгамчык хүнде өг-бүле бүрүзүнге менди-чаагай чорукту, аас-кежикти болгаш эп-найыралды күзеп тур бис. Хоочуннарга кадыкшылды болгаш узун назы назылаарын, а российжи шериглерге албан-хүлээлгезин эки эрттирерин йөрээлиңер. ТШО-да российжи шеригге болгаш эки турачыларга, оларның аразында маадырлыг чаңгыс чер чурттугларывыска Тиилелгелиг чанып кээрин күзеп тур бис!
Ада-чурт камгалакчыларының хүнү-биле!

ТР-ниң Дээди Хуралының Даргазы К. ДАВАА.

«Шын» №13 2024 чылдың февраль 21