Тыва Республикада социал угланыышкынныг албан черлеринде ажылдап чоруур хөй санныг ишчилерге база Кызылдың хоочуннар болгаш инвалидтер дазылга бажыңының хүн бүрүде буянныг үүле чедирип чоруур ажылчыннарынга профессионал байырлалы-биле байырны чедирип олур бис!
Амыдыралдың берге байдалдарынга таварышкан кижилерге, ооң иштинде инвалидтерге, назылап кырааннарга, өг-бүлелерге социал деткимчени чедирип, оларның хереглелин хандырар дээш энерел сеткил-биле ажылдап чоруур кижилерниң бары өөрүнчүг.
Кызылдың хоочуннар болгаш инвалидтер дазылга бажыңының ажылдакчылары хоочуннарның чидиг айтырыгларын бир дугаарында боттарынга хүлээп, кандыг дуза-биле ону шиитпирлээрин хүлээнип ап чоруур кижилер. Деткимче дуза чокта шимчеп, амыдырап шыдавас кижилерниң күзенчиг, четтикпейн манап олурар эң чоок кижилери – дазылга бажыңының ажылдакчылары.
Кадык-чаагай чуртталганың өзээн салбайн, карак шиммейн кезээде-ле хоочуннарынга дуза кадар, камгалакчы эмчи сестралары, биче эмчи сестраларының, биске чаагай янзы-бүрү хуулгаазын шынарлыг аъш-чемни кылып берип турар поварларывыстың ажыл-ижи чымыштыг, чылыг-чымчак сеткили-биле долган буянныг.
Кырган болгаш инвалид кижиниң аарышкызын үлежип, чылыг сөстер болгаш ажыл-херээ-биле деткип, хөй чылдар иштинде шыдамык, дузааргак ажылдап чоруур ишчилерниң саны хөй. Оларга Мөгейип, чоргаарланып чоруур бис. Ёзулуг-ла «алдын» кижилер!
Июнь 8-те социал ажылдакчының профессионал байырлалында чүрээвистиң ханызындан четтиргенивисти илереттивис.
Хүндүлүг социал ажылдакчыларывыс, байырлалыңар-биле! Быжыг кадыкшылды, шыдамыккай чорукту, эгелээшкиннериңерге чедиишкиннерни база аас-кежикти күзедим” – деп, хоочуннарыңар йөрээп арттывыс!
Хүндүткел-биле, дазылга бажыңының хоочуннары
«Шын» №42 2024 чылдың июнь 8