Бөгүн чурттуң улуг байырлалы – Россия хүнүн калбаа-биле демдеглеп турар бис. Ол төрээн чуртувустуң бот-догуннаан чоруунуң херечизи. Россия – хөй нация чоннарның демнежилгезиниң болгаш чурттуң амгы база келир үези дээш ниити харыысалганың демдээ болуп турар.
Чуртувус амгы үеде онза чугула айтырыгларны шиитпирлеп турар. Ол дээрге барыын чурттарның муң-муң экономиктиг хоругдаашкыннарынга, кызагдаашкыннарынга удур дүн-хүн чок ажылдар, тускай шериг операция, ниити хөгжүлдени кошкатпазы, а харын-даа ооң темпизин шапкынчыдары-дыр. Бо бүгү амыр эвес айтырыгларны шиитпирлээри-биле бүгү чоннар улам сырый каттыжып, демнежир ужурлуг бис. Шынап-даа болза, чуртувустуң амыр-чаагай келир үези бистен, кижи бүрүзүнден, хамааржыр.
Тыва – чурттуң бүрүн эргелиг субъектизи. Россия эки хөгжүп, өзүп-мандыыр болза, бурунгу тыва черивис база сайзыраар. Ынчангаш бистен хамааржыр бүгү-ле чүүлдерни кылыр ужурлуг бис.
Бо байырлыг хүнде силерге эптиг, демниг чорукту, быжыг турушту, найыралды, а чуртувуска хөгжүлдени болгаш чедиишкиннерни күзээр-дир бис!
ТР-ниң Дээди Хуралының (парламентизиниң) Даргазы К. ДАВАА.
"Шын" №43 2024 чылдың июнь 12