Тываның төөгү намдарлыг төлептиг оглу Григорий Чоодуевич Ширшин 90 харлаан. Ук болууушкун-биле Тыва Республиканың Баштыңы Владислав Ховалыг аңаа байыр чедирген.
“Хүндүлүг Григорий Чоодуевич!
Силерниң кайгамчык 90 харлаан юбилейиңер ССРЭ-ниң хүрээлеңинге Тыва Арат Республиканың эки тура-биле бактаап киргениниң 80 чылдаанының байырлалында чугула болуушкун болур.
Удуртукчунуң ажыл-чорудулгазы чылдар эрткенде эки көстүр болгаш үнелеттинер. Тываны хөгжүдериниң талазы-биле ук ажыл кайы хире ханы болгаш системалыг турганын бөгүн көрүп тур бис, хүндүлүг Григорий Чоодуевич.
Бистиң өгбелеривистиң тудуп тургузуп кааны бүгү инфраструктура республиканың чурттакчыларынга ам-даа бараан болуп чоруур. Ол болза келир өйнүң кижи үүжезинге стратегтиг салыышкын болур. Үжен ажыг чыл эрткенде амыдыралчы инфраструктураның чаартылгазын чурттуң Президентизиниң база федералдыг чазактың деткимчези-биле чорудуп тур бис.
Көскү күрүне болгаш политиктиг ажылдакчы кижи болгаш, республиканың база ниитизи-биле чурттуң хөгжүлдезинге шылгараңгай үлүүн киирген онзагай кижилерниң одуруунда силер.
Хүндүлүг Григорий Чоодуевич, юбилийиңер-биле сеткилим ханызындан байыр чедирдим! Чүлдү-чүрээмден узун назынны, быжыг кадыкшылды күзедим. Силерниң сүмелериңер, мерген чагыгларыңар биске тоң херек”.
"Шын" №58 2024 чылдың август 3
Байыр чедириишкини
5 августа 2024
24