Эргим чаңгыс чер чурттугларым!
Россияның Президентизи Владимир Владимирович Путинниң Ада-чурттуң камгалакчыларының, Улуг Тиилелгениң 80 чылы кылдыр чарлааны 2025 чыл төөгүже чоруп тур. Тываның чурттакчыларынга ол чугула болгаш харыысалгалыг ажыл-херектерниң чылы болган.
Республиканың шупту чурттакчылары тускай шериг операциязының киржикчилеринге дузалап турган. Школачылар, студентилер, ТШО-нуң киржикчилериниң өг-бүлелери, республиканың активчи кижилери амы-тынындан чарылган маадырларның эрес-дидим чоруунга мөгейип, бистиң дайынчыларывыска деткимче кылдыр хөй-ниитижи болгаш чогаадыкчы төлевилелдерниң эгелекчилери болганнар. “Тываның маадырлары” кадрлар политиказын 2025 чылда боттандырып турар бис, төрээн Тывазының хөгжүлдезинге ачы-дузалыг боор ажыл-херектерни тускай шериг операциязының киржикчилери тайбың чуртталгада тып ап турарлар.
Улуг Тиилелгениң 80 чылынга тураскааткан байырлалдың шериг парадынга бистиң солдаттарывыс болгаш офицерлеривис-биле кады Моолдуң шериглери бир дугаар эрткен. Ада-чурттуң камгалакчыларынга кайгамчыктыг ийи тураскаалдар Тываның найысылалында тургустунган – Тыва Арат Республикадан ат-сураглыг дайынчылар Шумов алышкыларга болгаш амгы үениң маадырлары – тускай шериг операциязының киржикчилеринге.
Владимир Владимирович Путинниң даалгазы-биле төнүп турар чылда 6 чаа школаның тудуун доостувус. Сөөлгү үш чылдар дургузунда бистиң 7 муң ажыг уруг-дарыывыс эки шынарлыг алгыг-делгем школаларда өөрени бергеннер.
Чуртталга бажыңнарының тудуу Тывада дүрген чоруп турар. Хөй өг-бүлелер, эң ылаңгыя аныяктар, чиигелделиг ипотека-биле квартираларга чедингеннер. Биче болгаш ортумак бизнес дүрген сайзырап, сайгарлыкчы ажыл-херектерже кирген чурттакчылар республикада көвүдээн.
Солун болгаш ачы-буянныг ажыл-херектери-биле эрткен чылды долдурган, бодунуң хүн бүрүде ажылы-биле Тываны хөгжүдүп турар шупту кижилерге өөрүп четтиргеним илереттим. Төнүп турар чылда шыдажып эрткенивис шупту шылгалдалар, шупту бергедээшкиннер бисти чүгле дадыктырып, улам бурунгаар шимчээшкинче углап турар. Келир чаа чыл бистиң республиканың чаагай чоруу дээш эң дидим чаа планнарны күүседириниң болгаш төлевилелдерни чедиишкинниг боттандырарының үези болзун!
Эргим өңнүктер! Россияга 2026 чылды Чурттуң чоннарының чаңгыс деминиң чылы кылдыр чарлаан. Ол чыл бисти Тиилелгеже чоокшуладып, бистиң хөй национал Россиявыстың шупту чоннарының быжыг деминиң болгаш күжүнүң сүлдези боорунга бүзүрелдиг мен.
Эргим чаңгыс чер чурттугларым!
Чаа 2026 чылда силер бүгүдеге чаагай чолду, аас-кежикти база быжыг кадыкшылды күзедим! Шак бо чараш байырлалда күзелдер бүдүп, сагыш-сеткил өөрүп, хей-аът көдүрлүр болзун!
Чаа 2026 чыл-биле! Чаа чыл-биле!
Тыва Республиканың Баштыңы Владислав Ховалыг.
Чурукту ТР-ниң Чазааның парлага албанындан алган.