Байыр чедириишкини

Эргим чуртташтарым!

Бөгүн бистиң чуртувустуң кол байырла- лы – Россияның хүнү. Бо кайгамчык байырлал-биле силер бүгүдеге байыр чедирип тур мен!
Бо хүннерде бистиң хамаарышпас чоруувус болгаш бистиң күрүневистиң турар азы турбазының дугайында айтырыг көдүрлүп келгенде, Төрээн чуртка ынакшыл, сырый каттыжылга, Ада-чуртка бердиниишкин дээн сөстерниң ужур-утказын үнелээривис хөлчок апарган. Россияның хүнү бистиң хөй омак-сөөктүг чоннарывыстың күчү-күжүнүң демдээ болган.

Бис ооң төөгүзү, күчү-күжү, бойдустуң болгаш сагыш-сеткилдиң кижи көрүп көрбээн байлактары дээш чоргаарланып чоруур бис. Бистиң баштыңчывыс, Россияның Президентизи Владимир Владимирович Путинниң экономиканы чаартыр, Россияның күчү-күжүн болгаш хамаарышпас чоруун мөөңнээринче угланган курузу улус-чоннарның ортузунда калбак деткимчени алган, чоннарны улам сырый каттыштырган.

Өске регионнар-биле бир дөмейи, Тыва Россияның эрге-ажыктарын камгалажып турар. Бистиң эрес-дидим, шудургу дайынчыларывыс Ада-чуртту камгалаар талазы-биле албан-хүлээлгелерин күүседип турарлар. Республика ону бүгү талалыг деткип турар. Ындыг болур-даа ужурлуг, чүге дизе бис 1945 чылдың Улуг Тиилелгезинге бүгү-ле чүүлдерни кылган Тыва Арат Республиканың күш-ажылчы чонунуң салгакчылары болгай бис.

Тиилелге бистии болуп доостур. Ок-чепсекти холунда туткан российжилер бүгү аргаларны ажыглап тургаш, ажы-төлүнүң келир үезин хандырып шыдаарлар.
Байырлал-биле, эргим чаңгыс чер чурттугларым!

Тыва Республиканың Чазааның Даргазы В. ХОВАЛЫГ.

"Шын" №42 2023 чылдың июнь 10