Тѳѳгүлүг Алдан-Маадыр суурувустуң Ооржак Түмен-Байыр аттыг школазы бо чылын 80 чыл болган байырлалын демдеглеп эрттирип турар. Школавыс дугайында тѳѳгүлүг материалдар чыгдынган болгаш камныы-биле кадагалаттынып турар. Школа «Уруглар кижизидилгези – хѳй-ниитиниң, кижи бүрүзүнүң херээ» деп кыйгырыг-биле ажылдап турар.
Алдан-Маадыр суму чагыргазы, школа, уруглар сады, Самбажык аттыг Культура бажыңы, Хунаштаар-оол аттыг уран чүүл школазы, Ада-иелер чѳвүлели, Херээженнер, Адалар чѳвүлелдери кижизидилге ажылын сырый харылзаалыг чорудуп турарлар. Школавыс директору Екатерина Ондар коллективин хѳй чылдарда билдилиг удуртуп турар. Ол – хѳй шаңнал-макталдыг, ат-алдарлыг башкы, «РФ-тиң Ѳѳредилгезиниң алдарлыг ажылдакчызы», «Мергежилинге шынчы чорук» хѳрек демдектериниң эдилекчизи.
Алдан-Маадыр ортумак школазы Сүт-Хѳл кожуунда билиг шынары болгаш кижизидилге ажылы эки школа кылдыр санаттынып турар. Ѳѳредилге болгаш корум-чуруму эки деп мактадып чоруурунга школаның удуртулгазы болгаш хоочун башкыларның үре-түңнелдиг ажылы улуг идиг бооп чоруур. Оларга хоочуннардан орус дыл башкызы Раиса Шаңгыр-ооловна, математика башкызы Надежда Дугаровна, директорнуң ѳѳредилге-кижизидилге, патриотчу кижизидилге талазы-биле оралакчылары Саглай Салаватовна, Омак Владимирович, Алена Викторовна хамааржыр. Коллектив эптиг-демниг, арга-сүмелиг. Ынчангаш башкылар коллективинге чаа-чаа чедиишкиннерни, быжыг кадыкшылды, ак орукту күзедим.
Чылбак МОНГУШ,
күш-ажылдың болгаш херээженнер ажылының хоочуну, РФ-тиң хүндүлүг башкызы, «Шын» солуннуң хоочун бижикчизи.
“Шын” №76 2024 чылдың октябрь 5