Дээди Хуралдың Даргазы, «Чаңгыс демниг Россия» партиязының регионалдыг салбырының бирги секретары Каң-оол Даваа партияның баш удур соңгулдаларны эрттирген оргкомитеттиң түңнел хуралын удуртуп эрттирген.
Тыва баш бурунгаар бадылаашкынга эң-не хөй соңгукчулуг үш регионнуң аразынче кирген. Федералдыг деңнелдиң партия удуртукчулары ук ажылды чорударынга республиканың идепкейлиг киржилгезин демдеглээн.
“"Чаңгыс демниг Россия" партиязының баш удур соңгулдазын эрттирген оргкомитеттиң түңнел хуралын эрттирдивис. Аңаа бүгү-ле кылган ажыл-чорудулгавысты түңнедивис. Бистиң республикавыс бо ажыл-чорудулгага идепкейлиг киришкен, комитеттиң ажылы кончуг шыңгыы болган. Бистиң партияның федералдыг деңнелдиң удуртукчулары баш удур соңгулдаларга хөй санныг соңгукчулар киришкен үш регионнуң бирээзи Тыва дээрзин онзалап демдеглээн" - деп, Каң-оол Даваа чугаалаан.
Баш бурунгаар бадылаашкынның тиилекчилери:
Чаңгыс мандаттыг соңгулда округунга (Күрүне Думазының соңгулдалары) – Россияның Маадыры, Тываның аныяктар херектериниң сайыды Буян Куулар (28920 үн);
Даңзы аайы-биле – Шолбан Кара-оол;
Сүт-Хөл кожууннуң 10 дугаар чаңгыс мандаттыг соңгулда округунга – Темир Сарыглар.
«Бо неделяда муниципалдыг деңнелге баш удур немелде бадылаашкын болур. Бо ажыл ам-даа уламчылап турар. Баш бурунгаар бадылаашкын үезинде бистиң соңгукчуларывыстан немелде дилеглер кирген. Чаа Улусчу программаже бүгү Россиядан 1,5 миллион ажыг саналдар киргенин «Чаңгыс демниг Россия» партиязының даргазы Дмитрий Медведев демдеглээн. Тываның регионалдыг салбырынга 2000 ажыг санал-онал кирген” – деп, Каң-оол Даваа немээн.
«Баш бурунгаар бадылаашкынның кол утказы – кыйгырыглар эвес, а херек кырында кылып чорудар ажыл-херек. Бүгү республиканы, ырак суурлардан эгелээш, кезип, суурларда амыдыралды экижидеринге чүү херек дээрзин чурттакчылардан айтырган бис. Ол санал-оналдар келир үеде кандидаттарның ажылының үндезинин тургузуп, Күрүне Думазының соңгулда кампаниязынче кирер» - деп, «Чаңгыс демниг Россия» фракциязының депутады Людмила Осмоловская чугаалаан.
Баш бурунгаар бадылаашкын дээрге кол соңгулда хүнүнде «Чаңгыс демниг Россияны» төлээлеп кирер кандидаттарны тодарадыры-дыр. «Чаңгыс демниг Россия» дээрге чуртта баш бурунгаар соңгулдаларны чонга ажыы-биле эрттирип турар чаңгыс партия-дыр.
Чуруктарны “Чаңгыс демниг Россия” партиязының ТР-де салбырындан алган.