2025 чылда Россия Федерациязының Культура яамызының тургусканы “Көдээниң культура ажылдакчызы” деп чаа программа ёзугаар Самба, Аяна Ойдуптарның өг-бүлези Башкир Республикаже ажылдап чорупкан. Олар Иглин кожууннуң төвү Иглин суурнуң культура ажылдакчыларының аразынче төлептии-биле киргеш, шудургу ажылдап кирипкен.
“Бис мында ай ажа бердивис. Коллектив бисти дыка эки хүлээп алды. Мен бодум Иглинскиниң төп кожуун библиотеказында ажылдап тур мен. Уруг-дарыывысты школаже, уруглар садынче тургускулап алдывыс. Кээривиске, чурттаар оран-сава-биле дораан хандырып берген. Беш чыл маңаа ажылдап-чурттаар бис” — деп, библиограф Аяна Ойдуп чугаалаан.
Ойдуптар Иглин суурнуң уругларның уран чүүл школазында улустуң хөгжүм херекселдериниң салбырынга боттарының тыва аас чогаалының өг-бүле ансамблин тургузар сорулганы салып турар дугайында медээ Башкир Республиканың БСТ телеканалынга үнген.
Удавас башкир суурга тыва хөгжүм херекселдери чаңгыланып, тыва улустуң ырлары дыңналып келирин суурнуң чону четтикпейн манап турар дизе, хөөредиг болбас-ла боор. Салым-чаяанныг чаңгыс чер чурттугларывыстың ажыл-ижи чогунгур болурун күзедивис.
Медээни болгаш чурукту интернет четкизинден алган.
“Шын” №48 2025 чылдың декабрь 11