Бо хүннерде Тыва Республиканың өөредилгезиниң алдарлыг ажылдакчызы Луиза Балчый-ооловна Дамбар 80 харлаан юбилейин демдеглеп турар. Хоочун башкының өскен-төрээн чурту Барыын-Хемчик кожууннуң Аксы-Барлык сумузу.
Луиза Балчый-ооловна Барлык, Ийме, Хайыракан, Чадаананың 3 дугаар база Сукпак школаларынга барык 43 чыл башкылаашкын ажылынга үзүк чок ажылдаан. Ажылдап чораан үелеринде ооң чедиишкиннери хөй, чижээ, Сукпак школазынга улуг дуржулгалыг башкы Борбак-оол Иргитович Араптанның удуртулгазы-биле школага тыва дыл, литература кафедразын ажыдып, методкабинетти тургускан, «Колосок» уруглар садынга методиктиг ажылды амгы үениң негелдезинге дүүштүр «Хөгжүлдениң программазын» ажылдап кылгаш, мөөрейлерге киириштиргеш, шаңналдыг черлерге чедирген, ол уруглар сады Бүгү-российжи мөөрейге 2008 чылда тиилекчи болган.
Филология эртемнериниң доктору Доржу Сеңгилович Кууларны, ТР-ниң улустуң башкызы Кимаа Биче-ооловна Март-оолду, ТР-ниң улустуң башкызы, РСФСР-ниң алдарлыг башкызы Борбак-оол Иргитович Араптанны, РСФСР-ниң алдарлыг башкызы, Улус өөредилгезиниң тергиини Валентина Седиповна Шурукту өөредилге, ажыл-амыдыралынга орук айтып, салдар чедирип, арга-дуржулгазын берген башкылары деп санап чоруур.
Хүндүлүг башкы бо хүннерде ажы-төлүнүң аразында аас-кежиктиг амыдырап-чурттап чоруур. «Назы-харым улгатса-даа, уруг-дарыымның ажы-төлүн өстүржүп, бут кырынга тургусчуп, шаам-биле хөй-ниити ажылдарынга идепкейлиг киржип чоруур мен. Аныяк-өскенге күзээн сорулгазын ыяап чедер, сөглээн сөзүнге ээ болур, чайгылчак болбайн, быжыг туруштуг, тура-соруктуг болурун күзээр-дир мен» — деп чагып-сургап чоруур.
Кызылдың хөгжүм училищезинге кады өөренип чораан эштериниң мурнундан эживиске сеткиливис ханызындан юбилейин таварыштыр байырывыс чедирбишаан, каң дег кадыкшылды, узун назынны, кылган-туткан үүле-херээ чогуп чоруурун күзээр-дир бис.
/ Светлана ДАНЗЫН-ООЛ,
ТР-ниң алдарлыг журнализи.
Чурукту авторнуң архивинден алган.
“Шын” №5 2026 чылдың февраль 12