Эрткен неделяда Тываның Өөредилге яамызы Тыва Республиканың Баштыңының шаңналын тыпсыры-биле, «Мээң башкым» губернатор төлевилелиниң мөөрей киржикчилеринге төлевилелдер камгалалын эрттирген.
Мөөрейге республиканың бүгү булуңнарындан 33 башкы киришкен. Башкылар төлевилелдерин камгалап тургаш, боттарының профессионал чедиишкиннерин, чогааткан арга-хевирлерин, инновациялыг ажылдарын таныштырган.
Тыва Республиканың Өөредилге яамызының удуртулга кежигүннери, институттар болгаш төптер удуртукчулары, Тываның күрүне университединиң, хөй-ниити организацияларының төлээлери эксперт комиссиязынче кирген. Комиссия кежигүннери киржикчилерниң төлевилелдерин дыңнап, ажыл бүрүзүн сайгарып, арга-сүмелерни болгаш чогумчалыг сагындырыгларны берген.
Төлевилелдер камгалалынга олуржуп турган Тываның өөредилге сайыдының хүлээлгезин күүседип турар Орлан Соян мөөрей киржикчилериниң боттарының мергежилинге бердингенин, өөредилге чорудуунга эки арга-дуржулгаларны ажыглап киирер дээн чүткүлүн демдеглээн. Ол ышкаш мындыг мөөрейлер чүгле салым-чаяанныг башкыларны илередир эвес, а башкылаашкын ажылының мурнакчы арга-дуржулгазын бүдүн республикага нептередиринге идигни бээр дээрзин демдеглээн.
Башкылар ажылдарын камгалап тура, регионнуң өөредилге системазының хөгжүлдезинге киирген үлүг-хуузун, профессионал билиг-мергежилиниң бедик деңнелин, аныяк салгалды өөредип-кижизидеринге чогаадыкчы көрүжүн көргүскеннер.
Тыва Республиканың Чазааның чанында мөөрей комиссиязы хуралдаан соонда, ооң түңнелдери билдингир апаар. Регион Баштыңының премиязын алыр тиилекчилер хөй чылдарда ак сеткилдиг күш-ажылы дээш төлептиг үнелелди алыр. Башкылар хүнүнүң байырлалынга тураскаадып, лауреаттарны шаңнап-мактаар.
«Мээң башкым» губернатор төлевилели башкыларны деткииринден аңгыда, өөредилге чорудуунга чаа идеяларны болгаш арга-хевирлерни ажыглалче киирер шөлдү тургузар. Төлевилел ёзугаар 2025 чылда 32 башкы 20 муңдан 1 млн рубль чедир акша шаңналдарын алган. Профессионал мергежилдиң янзы-бүрү мөөрейлер тиилекчилеринге болгаш шаңналдыг черлер кирген башкыларга шаңналдарны тывыскан. 10 башкы инновациялыг өөредилге программаларын болгаш технологияларны боттандырганы дээш, Тываның Баштыңының премиязынга төлептиг болганнар.
/ А. МОНГУШ.
Чурукту ТР-ниң Чазааның парлалга албанындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...