«Авангард» өөредилге-методиктиг шериг-патриотчу кижизидилге төвүнде республиканың 7 кожуунундан амыдыралдың айыыл чок чоруунуң үндезиннерин өөренир эртемниң башкылары арга-дуржулгазын солчуп, чаа билиглерни алыр дээш келген. Хемчегде ниитизи-биле 30 башкы киржип турар. Шак мындыг чыыш Тывада бир дугаар болуп турары бо. Ук өөредиглер тус черлерниң башкыларынга кончуг ажыктыг дээрзин башкылар демдеглээн.
Межегей ортумак школазының башкызы Чиңгис Моңгуш:
– Өөредиг солун-дур. Чүгле теория кырында эвес, а тудуп, кылып, бодувус киржип турар бис. Ол кончуг ажыктыг. Бо чыышка шиңгээдип алган билиивисти өөреникчилеривиске дамчыдар бис.
Сосновка ортумак школазының башкызы Айлана Куулар:
– Аванградка келгеш, дыка солун чаа чүүлдерни билип ап тур бис. Идииниң шидиишкинин канчаар шын баглаарын, формазын канчаар кончуг дүрген кедерин көргүзүп турду. Өске школаларның башкылары-биле таныжып, арга-дуржулга солчуру ажылга ажыктыг.
«Юнармия» шимчээшкинниң регионалдыг штавының даргазы Айдың Шивидектиң медеглээни-биле алырга, ук кичээлдер сентябрь 16-га чедир уламчылаар.
Бистиң корр.
«Шын» №68 2023 чылдың сентябрь 13