Башкыларның улуг чыыжын эрттирерин чугула ажыктыг деп санап тур мен

ТР-ниң Баштыңының 2023 чылда Айыткалынга хамаарыштыр ТР-ниң Дээди Хуралының өөредилге, культура, спорт болгаш аныяктар талазы-биле ажылдаар комитеттиң даргазы Аяна Монгуш бодалдары-биле үлешкен:

– Тываның Баштыңының эмчилер биле башкыларның ажыл-ижин үнелеп, “Мээң эмчим” биле “Мээң башкым” деп төлевилелдерни ажылдап кылырын чогуур яамыларның сайыттарынга дагзып турарын онзагайы-биле демдеглеп тур мен. Оларның мергежилинде тургустунуп турар чидиг айтырыгларынга болгаш бергедээшкиннеринге дуза кадарын Даргавыс Владислав Ховалыг айыткады. 2023 чылда республиканың башкыларының аразынга улуг чыыш болур деп база шиитпирни дыңнадывыс. Ону ёзулуг онза чугула деп санап тур мен. Хөй үеде школага чаштарны эртем-билигге өөредип чоруур арга-дуржулгазы бедик, хоочун башкылар биле башкы мергежилиниң базымнарын чаа базып эгелеп чоруур аныяктар чаңгыс черге чыглып, өөредилге системазының шынарын кандыг аргалар-биле сайзырадып болурунуң дугайында бот-боттарының аразында удур-дедир арга-сүмелери-биле үлежип, чаагай чаңгыс аай демниг түңнелдерге келир боор деп бүзүрээр-дир мен. Чүге дизе өөредилге адырында частырыгларывыс хөй, ынчангаш улуг башкылар оларны канчаар шын эдип алырын биске айтып бээр-дир ийин. А аныяктар чуртталгаже чаа көрүштүг болганы-биле өөредилге системазын ажыктыг аргалар-биле чаартып болурунуң дугайында сүмелерни киирип болур. XXI чүс чыл информация технологияларының сайзыралының кидин түлүк үези болгай. Оларны кичээлдерге канчаар шын ажыглаарының дугайында олардан эки билип болур. Чаа ажылдап келген кижиниң көрүжү черле чаа болур. Ынчангаш аныяктарны база дыңнап чоруурун чугула деп санаар мен.

/ Алиса ДОНГАК чугаалашкан.
Ада ТЮЛЮШТУҢ тырттырган чуруу