Тываның найысылалынга «Башкының алдын демир-үжүү» деп чараштыр бижилгеге регион мөөрейиниң түңнел чадазы болуп эрткен. Хемчегге республиканың аңгы-аңгы кожууннарындан башкылар киржип, чараштыр бижиириниң уран аргаларын көргүзүп, амгы үениң өөредилгезинге ооң ужур-дузазын демдеглээннер.
Бо чылдың апрель айда Тывага «Башкының алдын демир-үжүү» деп чараштыр бижилге мөөрейиниң шилилге чадазы онлайн хевирге эгелээн турган. Түңнел чадазынче эртип келген башкылар чыглып кээп, кымның холунуң үжүү эң чаражыл, кым эң бижик-билиглигил деп маргышкан. Бо чылгы мөөрейни Славян бижик болгаш культура хүнүнге тураскааткан.
«Мөөрей ийи чадалыг: бир дугаарында олар эң-не чараш хол үжүүн илередири-биле ажыл бижиирлер, а ийи дугаарында – диктант. Бо бүгү 3 чаданың түңнелинде, аңгы-аңгы номинацияларга тиилекчилерни тодарадыр бис» — деп, жюри кежигүнү Маргарита Ширап дыңнаткан.
Мөөрейге 10 башкы киришкен. Элээн каш шак дургузунда олар чүгле тода болгаш арыг-силиг болурун негээр эвес, а харын-даа чогаадыкчы чорукту негээр онаалгаларны күүсеткеннер. Жюри кежигүннериниң чугаазы-биле, кол кичээнгейни шугумнарның чараш болурунче болгаш тургузугларның хөөннеш болурунче угландырган. «Каллиграфия азы чараштыр бижилге дээрге чүгле билиг-мергежил эвес, а уругларны шыдамык чорукка болгаш чараш чүүлдерге ынак болурунга кижизидер уран чүүл болур. Чадаананың 3 дугаар школазындан бо мөөрейге киржип келдивис. “Эң-не чараш хол үжүү” деп бирги мөөрейни чаа-ла эрттивис. Мындыг онзагай мөөрейге киржип келгенимге өөрүп тур мен” — деп, мөөрейниң киржикчизи башкы чугаалаан.
Тиилекчилерни дараазында номинациялар аайы-биле илереткен: «Эң чараш хол үжүү», «Леттеринг мастери» болгаш «Тергиин угаанныгбай». Киржикчи бүрүзүнге шаңнал бижиктерни болгаш белектерни тывыскан.
Бистиң корр.
Чурукту интернет четкизинден хоолгалаан.
“Шын” №20 2025 чылдың май 29