2025 чылдың декабрь 10-да Тываның эң баштайгы херээжен даш чонукчузу, РСФСР-ниң И.Е. Репин аттыг Күрүне шаңналының лауреады, Тыва АССР-ниң алдарлыг чурукчузу Раиса Ажыевна Аракчаа чораан болза, 100 харлаар турган.
Совет үеде чүгле Тываны эвес, а ССРЭ-ни делегейге алдаржыткан кайгамчык салым-чаяанныг даш чонукчузунуң кылган ажылдары делегейниң улуг музейлеринде ховар экспонаттар кылдыр ам-даа делгеттинген болгаш ооң даш чонар уран чүүлге киирген үлүг-хуузун бедик үнелел-биле ында-мында МИЧ-тиң ажылдакчылары чырыдып турары өөрүнчүг.
Сураглыг даш чонукчузу Раиса Ажыевна 1925 чылда ТАР-ның Улуг-Хем кожуунунуң Кара-Талга хөй ажы-төлдүг бөдүүн арат өг-бүлеге төрүттүнген. Ол бичиизинден тура-ла чуруурунга сундулуг кылдыр өзүп келген. Бичиизинде авазы биле даайының ыяш чөвүрээзинден болгаш чымчак ыяштан дүрзүлер сиилбип турганын көргеш, чоорту чазаныр талазы-биле улуг сонуургалдыг апарган. Ынчалдыр ол чүгле ыяштан эвес, а чонар-даштан янзы-бүрү дүрзүлерни сиилбип кылып эгелээн. Ооң ындыг шевер ажылдарын көргеш, сураглыг даш чонукчузу Хертек Тойбухаа ону холунга ап, улаштыр даш чонар уран чүүлге сонуургалын улам күштелдирип, бодунуң билири кончуг ховар аргаларга өөредип каан.
Улуг мастерниң удуртулгазы-биле Раиса Аракчааның чонар-даштан сиилбип кылган ажылдары чоорту хөйге билдинип, Тывага, ССРЭ-ниң улуг хоорайларынга болгулаан улуг делгелгелерге салдынып, делегей чергелиг алдаржый берген. Ол үениң билдингир дээн уран чүүл ажылдакчылары херээжен даш чонукчузунуң сиилбип кылган дүрзүлериниң онзагайын демдеглеп, бедик үнелелди берип турганын төөгү материалдарындан номчуп болур.
Раиса Ажыевна карандаш сугар саваларны дириг амытаннар дүрзүзүн киирип тургаш, чонар-даштан чогаадып кылган баштайгы даш чонукчуларының бирээзи болуп төөгүде арткан.
Тываның бир дугаар херээжен даш чонукчузу Раиса Аракчааның чонар-даштан сиилбип кылган 100 ажыг ажылдары Алдан-Маадыр аттыг национал музейде шыгжаттынган.
Чурукту интернет четкизинден алган.
“Шын” №49 2025 чылдың декабрь 18