Олимпийжи белеткел төвүнүң спорт залынга ноябрь 22–24 хүннеринде "Сүбедей" спорт школазының удуртулгазы-биле республиканың бирги чери дээш баскетбол маргылдаазы болуп эрткен. 2011–2012 чылда төрүттүнген оолдарның 16 база уругларның 14 шилиттинген командалары ойнаан.
"Сүбедей" спорт школазының баскетбол тренери база маргылдааның кол шииткекчизи Чойган Ондарның дыңнадыы-биле, уруглар аразынга тренер башкы Юрий Полевтиң белеткээни Күрүне лицейиниң командазы бүзүрелдии-биле бирги черни чаалап алгаш, "Тергиин команда" деп атка төлептиг болган. Дараазында 2-ги черни тренер башкы Белек Монгуштуң белеткээни 16 дугаар лицейниң командазы база 3-кү черни Мөңгүн-Тайга кожууннуң Кызыл-Хая школазының тренер башкызы Кимаа Максаржаповнаның белеткээн командазы алган.
Оолдар аразынга 1-ги черге Барыын-Хемчиктиң олимпийжи курлавырлар спорт школазының найыралдыг командазы төлептиг болганнар (тренери Чойгаана Ооржак). 2-ги черни Кызылдың күрүне лицейиниң командазы (тренери Юрий Полев), 3-кү черни Чөөн-Хемчиктиң командазы (тренери Сайын-Белек Кара-Сал) алганнар. Бичии ойнакчыларга база тренер башкыларынга шыырак белеткелди база бедик спортчу чедиишкиннерни күзедивис.
А.ЧАМБАЛ-ООЛ, спорттуң хоочуну.
“Шын” №92 2024 чылдың ноябрь 30