Федералдыг чергелиг Р-257 автомобиль оруунда Оттук-Даш арбаны биле Ийи-Тал суурнуң аразында оруктуң 859–882 километр участогу даглыг чер болгаш, ында дөңгелчиктер, кудургайлар, ээр черлер хөй. Ынчангаш орукка шимчээшкин үезинде оваарымча чок, орукка шимчээшкинниң чурумун сагываан азы эзирик чолаачыларның буруузу-биле бо участокка автомобиль озал-ондактары бо-ла болу бээр. 859–870 километр орук участогун Кызыл – Шагаан-Арыг аразында автоорукта эң айыылдыг чер деп чолаачылар санап турар.
Тываның Баштыңы Владислав Ховалыг Улуг-Хем кожуунга ажыл-херектер аайы-биле чорааш, оруктуң бо участогунга автотранспорт шимчээшкинин айыыл чок болдурар сорулга-биле ында орукту дескилээр, доора дургаар хемчээлин ам-даа алгыдар даалганы орукчуларга берген. Амгы үеде Р-257 оруктуң 859–870 километрлеринде септелге ажылы кидин түлүк чоруп турар. 11 километр узун дурттуг орук участогунда септелге ажылдары орту кирген. Ында оруктуң кырыкы асфальтылыг шывыын соя соккаш, адаккы таваан дескилеп тырааш, ооң кырында асфальтыны чадып турар. Оттук-Дашта автобус доктаар черни база чаарткан. Оруктуң айыылдыг черлеринге камгалал куржагларны тургузар, орук шимчээшкинин айтыр демдектерни кадап, орук айтыкчызы болур шугум демдеглелдерин будуп шыяр.
Р-257-ниң бо участогунга машина-балгаттыг чорууру түр када арай эпчок-даа бол, чолаачылар болгаш пассажирлер септелгени кылып, оруктуң байдалын экижидеринге таарзынып турарлар.
Совет үеде бо оруктуң 859–870 километрлеринде участокту дорттаар талазы-биле ажылдарны эгелей берген турган. 870 километрде чооганы кежилдир салыр көвүрүгнүң ийи талакы хавактарын чалдай үстүрүп кааны-даа бо хүннерде көскү. Оруктуң бо участогун дортай септээр ажылдарның төлевилел-смета документилерин ажылдап кылганын республиканың орук эргелелиниң хоочуннары чугаалап, Р-257 оруктуң 859–870 километрлеринге септелге ажылдарының келир үеде дараазында чадазы бо участокка орукту дорттаары боор деп идегелин илередип турарлар.
/ Ш. МОҢГУШ.
Авторнуң тырттырган чуруктары.
“Шын” №22 2026 чылдың июнь 11