База бир өөредилге черинде капитал септелге

Туран хоорайның 2 дугаар школазының оран-савазында “Өөредилге” национал төлевилел-биле капитал септелгени эгелээн. Бии-Хем кожуундан президентиниң программазында 2 дугаар школа киржип турары бо. Эрткен чылын Тарлаг ортумак школазынга база капитал септелгени кылган.

Амгы үеде ук оран-саваны септээри-биле бускаш, материалдарны чедирер ажылдар чоруп турар. Ук школаның өөреникчилерин Туранның 1 дугаар школазының 2 дугаар ээлчээнге өөредири-биле көжүрген.

“Капитал септелгеже электри удазыннарын, соңгаларны, эжиктерни, арыгланыр өрээлдерни, шалаларын, ханаларын, дээвиирин дээш барык шуптузун чаарттып, солууру кирип турар. Серизин база албан чаартыр. Эрткен чылын школаның спорт залын база “Өөредилге” национал төлевилел-биле чаарткан. Школада күрүне шылгалдалары эрттирер чер чок. Кичээлдер чурум ёзугаар чоруп турар. Ажылдың хемчээли улуг болганындан дыштанылгалар манавайн эгелей берген бис. Ада-иелер бисти билип турар” – деп, Бии-Хем кожууннуң чагыргазының Өөредилге эргелелиниң даргазы Чаян Маады демдеглээн.

Доозукчуларның шылгалдаларын эрттирериниң дугайында айтырыг шиитпирлеттинген. Септелге ажылдары аңаа кандыг-даа шаптараазын тургуспас. 9-ку, 11-ги класстарның шылгалдалары Туранның 1 дугаар школазынга болуп эртер.