Тыва Республикада Росгвардияның ведомстводан дашкаар салбырының дайынчылары чүгле объектилер кадарып, оларның девискээринге кем-херек үүлгедиишкиннери, корум-чурум үрээшкиннери турбазын хайгаарап турар эвес, а үениң сайзырааны-биле автотранспорттарны база кадарып турар. Амгы үеде 73 техника оларның кичээнгейинде алдынган. Оларга найысылал Кызылдың иштинде база кожуун төптериниң аразында чон сөөртүп турар автобустар, школа автобустары, дүрген дуза чедирер экипажтар болгаш чоннуң хууда машиналары хамааржыр.
Чартык чылдың дургузунда росгвардейжилер ведомствонуң төпчүткен хайгаарал пультуларынче кирген 26 дүвүрээзин медээлерин хынап, патруль үнүүшкүннерин кылган. Эң-не хөй «сигнал» чон сөөртүр автобустардан кээп турган. Ооң кол чылдагааны болза пассажирниң хөй-ниити черинге шын эвес алдынып, дүвүрээзин тургузуп турарында. Оларның хөй кезии эзирик байдалда болуп турар. Чурум чок хамаатыларны росгвардейжилер тудуп, полицияның шагдаа ажылдакчыларынга хоойлу ёзугаар көөрү-биле дамчыдарлар.
Эптиг болгаш таарымчалыг дуза чедирер керээни Росгвардия-биле организациялар болгаш албан черлеринден аңгыда, хамаатылар боттарының хууда машиналарынга ажыглап, дугуржулганы кылып алырлар. Таарымчалыг болгаш бүзүрелдиг хандырылга берге байдалга таварышкан чонга ажыктыын чаңгыс эвес удаа көргүскен. Машиназының иштинге олурда, танывазы улус халдап азы сөөртүп чоруур пассажириниң байдалы бергедээни-биле, чолаачы дүвүрээзин медээзиниң кнопказын базып, үе чидирбейн, чогуур ужурлуг хемчеглерни росгвардейжилерден алган таварылгалар хөй.
«Бир эвес силерге айыыл тургустунуп келзе, тускай кнопканы базыптар силер. Ук «сигнал» ол-ла дораан төпчүткен хайгаарал пультуларынче кирер. Тускай системада автотехниканың кайнаар шимчеп бар чыдары көстүп турар болур. Ынчангаш Росгвардияның патрульдары кыска үе дургузунда, шимчеп-даа чоруур болза, айыткан машинаны сүрүп чедер» – деп, ведомствонуң инженер специалистери тайылбырлаан.
/ Анастасия Ооржак, Росгвардиянын парлалага албанынын специализи.
Авторнуң тырттырган чуруктары.
“Шын” №31 2026 чылдың август 13
"Шын" солуннуң МАХ-каналынга каттыжыңар: max.ru/channel_shyn