Май 25-тен 29-ка чедир Тыва Республиканың I дугаар бедик технологиялар чемпионады эмчи студентилер аразынга ийи профессионал угланыышкынга болган. Ол регионнуң профессионал мергежилдер чемпионадының шугуму-биле эртип турар.
Бүгү-российжи бедик технологиялар чемпионады республиканың медицина колледжиниң баазазынга эгелээн. Мооң мурнунда киржикчилер чүгле «Медицина болгаш социал ажаалда» деп угланыышкынга мөөрейлежип турган болза, бо чылын сургуулдар «Персоналдыг болгаш кадык камгалаар технологиялар» деп чаа угланыышкынга база күжүн шенешкен.
«Мөөрейниң негелделери езугаар бистиң сургуулдар 4 хүн дургузунда аар кемдээшкиннерлиг тускай шериг операциязының киржикчизи-биле ажылдаан. Олар бүрүнү-биле шинчилгени чорудуп, ол ышкаш реабилитацияның планын тургузуп, амгы үениң медициназының аргаларын ажыглап тургаш, кадыкшыл школазын эрттирген” — деп, республиканың медицина колледжизиниң директору Саида Монгуш чугаалаан.
Чемпионатта аңгы-аңгы эмнээр адырдан 5 сургуул киржип турар. Тывада бедик технологиялар чемпионадының угланыышкыннар даңзызын Россияның Чырыдыышкын яамызының хүлээп алганы чемпионаттар эрттирер чөвүлелдиң шиитпири ёзугаар тургускан.
“Бедик технологиялар чемпионады бо чылын бир дугаар эртип турары бо. Республиканың медицина колледжизиниң баазазынга “Амы-хуу кадыкшыл камгалаарының технологиялары”, Балгазын суурда Тываның агроүлетпүр технимунуң баазазынга “Көдээ ажыл-агый бүдүрүлгезиниң интеллектуалдыг системазы” деп угланыышкыннарга болган” — деп, ТР-ниң Өөредилге яамызының профугланыышкын килдизиниң начальниги Олимпия Ондар дыңнаткан.
Шак мындыг чемпионаттар келир үеде эмчилер болур сургуулдарның профессионал билиг-мергежилдерин сайзырадырынга ужур-дузалыг.
Республиканың медицина колледжизиниң сургуулу Тайгана Ондар мындыг улуг мөөрейде бир дугаар киржип турарын чугаалаан: «Бо мөөрейден чаа билиглер болгаш арга-дуржулгалар алыксап тур мен. Сургуулдар хөй билиглер алырынга шак-ла мындыг хемчеглерни эрттирери чугула-дыр».
Мөөрейниң түңнелинде эң хөй балл алган тиилекчи бо-ла угланыышкыннар-биле Калуга хоорайга күзүн Тываны төлээлеп киржир.
Бистиң корр.
Чуруктарны медицина колледжизиниң социал четкизинден алган.
“Шын” №20 2025 чылдың май 29