Апрель 19-та Тыва Республиканың чурттакчы чону регионнар аразынга “Енисей губерниязы: төөгүнүң 200 чылы” деп чурт-шинчилел диктантызынга киришкен.
Аңаа кончуг солун айтырыгларны сайгарып чугаалашкан. А.С. Пушкин аттыг Национал ном саңы – хемчегниң кол шөлчүгежи. Ук диктантыны Енисей губерниязының тургустунганындан бээр 200 чыл оюнга тураскаадып эрттирген.
А.С. Пушкин аттыг Национал ном саңының директорунуң оралакчызы Марина Балган: “Диктантыны Енисей губерниязының төөгүзүнүң дугайында билиглерни нептередир, республиканың аныяктарынга культура-төөгүлүг өнчүнү таныштырар сорулга-биле эрттирген. Шак бо ажыл төөгү-патриотчу кижизидилгеге, аныяк-өскенниң хостуг үезин шын ажыглаарын организастаарынга кончуг ажыктыг” – деп демдеглээн.
Красноярск крайның аныяктар библиотеказы хемчегни организастап эрттирген. А ТР-ниң А.С. Пушкин аттыг болгаш Хакасияның Н.Г. Доможаков аттыг Национал ном саңнары боттарының баазазынга тус-тузунда дузалашкан. Диктант хары угда Красноярск крайның, Хакас болгаш Тыва Республикаларның девискээринге болуп эрткен. Ооң киржикчилери 14 хардан 35 харга чедир аныяктар.
Тываның күрүне университединиң, Балгазын суурда Агроүлетпүр техникумда, Кызылда Экономика болгаш хоойлу-дүрүм техникумунуң база оон-даа өске өөредилге черлериниң сургуулдары улуг сонуургал-биле идепкейлиг киришкеннер.
Кожууннарның төп библиотека системаларындан Барыын-Хемчик, Каа-Хем, Кызыл, Бии-Хем, Таңды, Тес-Хем, Тожу, Чеди-Хөл, Эрзин кожууннар база чыда калбаан. Ниитизи-биле кожууннардан 134 киржикчи онлайн хевирге коштунган.
Студентилер диктантыда кирген даалгаларны чедиишкинниг күүсеткеннер. Чурт-шинчилел диктантызын тест хевирлиг тургускан. Ону кылырынга ханы билиглер херек. Чеже-даа нарын бол, ажыл кончуг солун болган. Чамдык айтырыгларга ханы сайгарылга херек, а чамдыктары боданырынче албадаптар дээрзин студентилер чугаалап турганнар.
Диктантыны түңнээш, киржикчилерге дипломнарны болгаш сертификаттарны тыпсыр.
Чыжыргана СААЯ белеткээн.