| КҮСКҮ ДЫШТАНЫЛГА |
«Школачы музейге хүн: музейде дыштанылга” деп төлевилел школачыларга дыштанылга хүннерин солун, чаа чүүлдерни билип ап, боттарынга ажыктыг кылдыр эрттирер арганы берген. Школаларда музейлер чүгле төөгү материалдарын делгээн чер эвес, оларга үндезилеп, өөреникчилерниң шинчилел ажылдары чорудар, төөгүнүң болуушкуннарын уламчылап шинчилээр, чаа-чаа чүүлдерни билип алырының шөлдери апарган. Школачы музейлерде төөгү материалдары, төөгүде боттарының ат-сывын арттырган ат-алдарлыг кижилерниң дугайында чүүлдер ниитилелдиң, амыдырал-чуртталганың аңгы-аңгы угланыышкыннары-биле харылзаалыг болгаш, өөреникчилерниң школа программазы-биле өөренип турары эртемнер-биле база харылзаалыг. Шак ынчалдыр салгалдарның аразында харылзаалар янзы-бүрү хевирлерге тургустунуп, үзүлбес кылдыр быжыгып, уламчылай бээр. «Школачы музейге хүн: музейде дыштанылга” деп төлевилел дыштанылга хүннеринде аңгы-аңгы “Школа музейинде материалдарның шинчилелдеринден билдинген чаа чүүлдер”, “Музей дугайында видеоролик”, “Төөгүнүң херечизи-биле ужуражыышкын” дээш оон-даа өске темаларга янзы-бүрү аргалар-биле эрткен. Күскү дыштанылга үезинде Тес-Хем кожууннуң Берт-Даг школазының музейинге “Берт-Дагга төрүттүнген салым-чаяан” деп хемчег болуп эрткен. Ону бистиң алдарлыг чаңгыс чер чурттуувус, уруглар чогаалчызы Александр Шоюннуң 70 харлаан юбилейинге тураскааткан. Хемчегни сонуургап келген школаның аңгы-аңгы класстарының өөреникчилеринге музейниң экскурсоводу база 5-ки класстың өөреникчизи Айрана Чооду алдарлыг чогаалчы, журналист чаңгыс чер чурттуувустуң дугайында чугаалап, сонуургаткан. Ооң соонда өөреникчилерге чылдың үелериниң, айларының онзагай чаражының дугайында чогаалчының бичии уругларга бижээн шүлүктеринден тывызыктарны болгаш викторинаны тыптырган. Аңаа 8-ки класстың өөреникчизи Вилория Дондай тиилээш, чигирзиг белек-биле шаңнаткан.
Өөреникчилерниң боттары дег, чажындан тура Берт-Даг суурга өскеш, чурттуң тергиин өөредилге черлери Щукин аттыг дээди театр училищезин, ооң соонда Горький аттыг литература институдун доозуп, уран чүүлге болгаш литературага бедик чедиишкиннерге четкен чаңгыс чер чурттуунуң дугайында солун чүүлдерни “Берт-Дагга төрүттүнген салым-чаяан” деп хемчегден билип алганнар. Чогаалчының шүлүктериниң уран номчулгалары-биле оолдар, уругларга солун болгаш ажыктыг хемчег доозулган.
Долаана МОНГАЛ, школа музейиниң удуртукчузу.
Авторнуң тырттырган чуруктары.
“Шын” №43 2026 чылдың ноябрь 5
"Шын" солуннуң МАХ-каналынга каттыжыңар: max.ru/channel_shyn