Тывада ноябрьның сөөлгү он хонуунда хенертен сооп келгени дош кежиглер оруун эртежик ажыдар арганы берген. Декабрь 4-те регионнуң ОБЯ регионалдыг эргелелиниң специалистери Улуг-Хем кожууннуң Эйлиг-Хем суурну тудуштурган Улуг-Хем кежиин машиналарның шимчеп кежеринге чөпшээрээн. Амгы үеде кежиглеп 10 тоннадан хөй эвес деңзилиг машиналар эртер кылдыр кызыгаарлаан.
Кыш санында-ла республикада беш дош кежиг ажыттына бээр. Эйлиг-Хем кежиинден аңгыда, Каа-Хем кожуунда Каа-Хемни кежир Бүрен-Аксы болгаш Белбей кежиглери, Улуг-Хемни кежир Кызыл кожуунда Баян-Кол кежии, Тожу кожуунда ийи кежиг: бирээзи Хамсара хемни кешкеш, удавас чес тывыжы эгелээр Ак-Суг деп черже бир кежиг база Тожу кожуун төвүнче чедер орукту хандырган Доора-Хем кежии бар.
Дош кежиглеп-даа азы анаа дош кыры-биле чорааш, серемчилелди кошкадып болбас дээрзин камгалакчылар республиканың чурттакчыларынга сагындырып турар. Анаа-ла тургустунган дош кежиглерни эртери хоруглуг деп тускай демдектерни тургускан болур. Бо хоругларны хажыткан машиналар болгаш кижилер айыыл-халаптарга таваржып болур.