Бөгүн ноябрь 6-ның хүнүнде "Енисей" Р-257 автооруктуң 840 дугаар километринге, Алдын-Булак этнокультурлуг комплекс чоогунга, «Toyota Wish» болгаш «Toyota Voxy" маркаларлыг чиик машиналарның үскүлешкениниң түңнелинде 5 кижи амы-тынындан чарылган, 5 кижи кемдээн. Кемдээшкин алган 5 кижиниң үжүнге ол-ла дораан эмчи дузазын чедирген, ийизин Кызылдың 1 дугаар республика эмнелгезиниң реанимация салбырынче алган.
Чогуур органнарның баш удур чугаалап турары-биле алырга, «Toyota Wish» маркалыг автомашинаның чолаачызы удур орукче кире халый бергеш, уткуштур чоруп олурган «Toyota Voxy» деп машина-биле үскүлешкен.
Бөгүн Тывада хар чаап турар. Чамдык кожууннарда ол кончуг кылыннаан. Агаар-бойдустуң бүргег болганы-биле оруктар орта көзүлбес, тайгыр. Ынчангаш далашпайн, машинаның дүргенин чогуур деңнелге тудуп, оваарымчалыг болуп, боттарын болгаш чоок кижилерин камнап, оларның кадыкшылынга болгаш амы-тынынга хумагалыг болуру чугула.
Бистиң корр.
Чурукту интернеттен алган.