| Январь 27 — фашистиг бүзээлээшкинден Ленинградты хостаан хүн |
Ленинград блокадазының үезинде кыжын бажыңнар эргип, бичии уруглар дилеп турган камгалакчы бригада Лена деп аттыг бичии кысты соок квартиразындан тып алганнар. Ол аштап, доңуп хилинчектенгенинден бодунуң фамилиязын безин сагынмас, долгандыр болуп турар чүүлдерни кичээнгейге албас болган. Өг-бүлезин чидирген, харыксыраан бичии уругнуң чугаазы үнместеп, чем чивестеп, «өжүп» эгелээн. Ол үеде тывылган чаштарның хөй кезиин камгалап ап шыдавайн турган.
Уруглар бажыңының одакчызы Коля дээр фронтучу бичии уругга ойнаар-кыс кылып берген. Эрги аржыыл-биле даараан ойнаар-кыстың карактарын, думчуун карандаш-биле чуруп каан, дүрзүзүнүң кээргенчии кончуг. Ойнаар-кыс аарып турар, аңаа ава херек деп Николай акый Ленага чугаалаан. Ынчан бичии уругнуң сагыш-сеткилинге бир-ле чылыг күзел оттуп, амыдыралдан халбактаныр удазынчыгаш тыптып келген ышкаш болган.
Лена ойнаар-кызын чемгерип, кулаанга сымыранып, хөрээнге чылыдыр куспактап алгаш удуур апарган. Чоорту ол экижип, сегереп эгелээн. Сөөлүнде барып Лена эмчи сестразы болган. Бүгү назынында ооң амыдыралы, кажан-бир пөс ойнаар-кыс аңаа чурттаар күштү бергени ышкаш, сагыш човаашкын болгаш буян-биле долган.
Чурукту интернеттен хоолгалаан.
“Шын” №3 2026 чылдың январь 29