ТЕННИГ БӨМБҮК
Мөөгүлерин чүктепкен
Чараа-чечен ырлап чор.
Бөрбек өөнче амырап,
Чаяӊнадыр чанып ор.
Кажар дилги бо келди,
Хаайы-биле чыттады.
Борбак чараа-чечен-даа
Бөмбүк болуп хуулупту.
Тенниг бөмбүк шиштээрге,
Тенек дилги дезипти.
«Чаржынчыг-ла
кортук» – деп,
Чараа-чечен каттырды.
Хуулгаазын-на аӊчыгаш –
Кулактары хензигбей.
Каяа-даа ол кортпас-тыр,
Кайгамчыктыг дидим-дир.
ЧАСКЫ КУШ
Сарапчавыс кырында
Садырадыр ушкулаар,
Дүнениӊ-не хуралдаар
Дүвүренчиг куштар бар.
Шылырткайнып
дагжап кээр,
Шыырак, улуг чалгынныг.
Шылавас-даа, уйгу чок,
Чыдын чытпас часкылар.
Даӊ-даа адар, элдептиг,
Дааш-шимээн чиде бээр.
Чажыт, бүдүү, көзүлбес
Часкы деп куш бисте бар.
КУРТЧУГАШТАР
Чайгы үе тоолзуг-дур,
Чалгаарап-даа четтикпес.
Дуӊмам, авам, ачам, мен
Дус-Хөлче баар, экизин!
Хензиг курттар бисти-ле
Кезээ шагда манаарлар.
Ол-бо чүктен үглепкеш,
Оюн эреп, чымчыктаар.
Олардан ам кортпас-даа,
Ойлап, дезип чорбас бис.
Кижиргендир суйбапкаш,
Кеживисти эмнеп бээр.
Хензиг-даа бол, ажыктыг,
Кежээ, шоваа куртчугаш.
Хөйнү эмнээр сүр-күштүг,
Хөлүн черле ээн кагбас.
Чинчи чажырары
Бистиӊ чоннуӊ оюнун
Бичии чаштар ойназын!
Шууштур-ла туруптаалы,
Шуру, чинчи чажыраал.
Холдарыңар мурнунче
Кончуг таптыг сунуӊар.
Кат дег бичии чинчини
Кайызынга чажырайн?
Кызыл өӊнүг чинчижик
Кымда-дыр чаа, тып көрем.
Тыппазыӊза, шүлүктээр,
Танцылаар сен, кежээпей.
/ Чаяна ШИЛОВА.
“Шын” №4 2026 чылдың февраль 5