ТШО-да кадыг-берге байдалдарда дайынчыларны деткип, оларга ачы-дуза чедирери-биле республиканың чурттакчылары чаңгыс демниг чоруун удаа-дараа көргүзүп, кожуун бүрүзү, хууда сайгарлыкчылардан эгелээш дузазын көргүзүп турар. Бо удаада Шагаа уткуштур демир чычаанны болгаш аъш-чем чыылдазын бии-хемчилер организастаан.
Бии-Хемниң чагырга чериниң чолаачылары, хууда сайгарлыкчылар Антон Хохлов, Станислав Дегтярев фронтуже чоруур автомашинаның артык кезектерин болгаш дугуйларын чаартып, бүгү талалыг белеткээн. Кожууннуң Төп эмнелгезиниң каңнакчызы Самет Ондар автомашинаның кырында чүък чүдүрер черин демирден каңнап кылган. “Эки херектиң оруу” деп ачы-дуза фондузу акцияга идепкейлиг киришкеш, кыска хуусаа дургузунда манчы, боорзак, далганны чедер шаанче чыып белеткээн.
Турандан хууда сайгарлыкчы Елена Байкараның эгелээшкинин ук кожууннуң чурттакчылары шупту деткип, автомашинаны болгаш чондан чыглып келген аъш-чем аймаан Хадың суурнуң чурттакчызы Сылдыс Кууларга хүлээткеш, орук-сууру менди-чаагай четкеш, шериг хүлээлгезин коргуш чок тура-соруктуг күүсеткеш, ал-боду дайынчы эш-өөрү-биле онча-менди тиилелгелиг чанып кээрин күзээш, фронтуже үдеп чоруткан.
Ынчалдыр ТШО киржикчизи чурттан ыракта эш-өөрүнге Шагаа уткуштур чоннуң чыып берген аъш-чемин, чоннуң белээ – автомашинага чүдүргеш, чиик-чаагай узун орукче аъттаныпкан.
Кожууннуң чонунга бо хире демниг чоруу дээш Бии-Хемниң чагырга даргазы Владимир Байыр-оол четтиргенин илереткен.
Бистиң корр.
Чурукту интернеттен алган.
“Шын” №5 2024 чылдың январь 24