Тыва Республиканың Күш-ажыл болгаш социал политика яамызы чаа өөредилге чылында өөреникчилерге школачы идик-хеп садарынга чылда чаңгыс катап бээр төлевирже билдириишкиннерни июнь 1-ден хүлээп эгелээнин дыңнаткан. Төлевирниң хемчээли — 1 уругга 5000 рубль.
Хөй ажы-төлдүг (18 харга чедир үш азы оон хөй ажы-төлдүг) иелер, уруг азырап алган ада-иелер, ажаакчы-тежээкчилери, чааскаан ажы-төл азырап олурар адалар (иези чок апарган, ис чок читкен деп чарлаан азы ада-ие эргези казыттынган таварылгада), ол ышкаш өскүс ажы-төл азырап алган ада-иелер, ажаакчы-тежээкчилери төлевирни алыр эргелиг.
Төлевирни алыр дизе, элээн каш негелделерни күүседир: өг-бүлениң кижи санынга онааштыр орулгазы регионда ажылдаар назылыг чурттакчы чоннуң амыдырап-чурттаарының кудуку хемчээлинден 1,25-ке ашпас (билдириишкин киирген үезинде), өг-бүле Тыва Республикада чурттап турар, өг-бүлениң шупту кежигүннери Россияның хамаатылары болур ужурлуг. Пособие акшазы ниити өөредилге черинге өөренир уругга школачы идик-хеп садарынга көрдүнген. Ада-иелер төлевир алыр эргелиг уруг бүрүзүнге билдириишкинни киирип, ооң-биле чергелештир боттарының хүлээлгелерин долу күүседир хүлээлгелиг, а уруг долу күрүне хандырылгазында болбас ужурлуг.
Тывада 2026 чылда ажылдаар назылыг чурттакчы чоннуң амыдырап-чурттаарының кудуку хемчээли 20850 рубль кылдыр доктааттынган, ынчангаш ук ачы-дузаны алырда, өг-бүлениң кижи санынга онааштыр ортумак орулгазы 26062,5 рубльден (20850×1,25) ашпас болурун сагындыраал.
Документилерни октябрь 31-ге чедир хүлээп алыр, төлевирни 2026 чылдың ноябрь 30-ге чедир төлээр.
Чурттап турар черинде Социал камгалал эргелелинче, ол ышкаш муниципалдыг район чагыргаларының Күш-ажыл болгаш социал хөгжүлде эргелелинче (Кызылда – хоорай мэриязының социал политика департаментизи) билдириишкинни боттары киирер.
Билдириишкинге паспортунуң болгаш төрүттүнген дугайында херечилелдерниң, хамааты байдал документилериниң (чижээ, бадылашкан азы чарылган дугайында херечилелдер) хоолгалары, уругнуң өөренип турар черинден шынзылга, өг-бүлениң орулгазының дугайында медээлиг бөлүк документилерни кады кожар.
/ Бистиң корр.
Чурукту ГигаЧат чураан.
“Шын” №23 2026 чылдың июнь 18
"Шын" солуннуң МАХ-каналынга каттыжыңар: max.ru/join/egenQ...