Июнь 1-ден эгелеп уругларның болгаш элээдилерниң чайгы дыштанылгазының болгаш кадыкшыдылгазының үези эгелээр. Чылдың-на Россияның “Билиг” ниитилели чайгы кадыкшыдылга компаниязының иштинге чырыдыышкын программазын организастаары-биле аңаа идепкейлиг киржип турар. Ол Россияның 89 субъектизиниң девискээринде лагерьлерниң дыштаныкчылары уругларга алды төлевилелди белеткээн.
«Уруглар лагери бүрүзү чай дургузунда боттарының кижизиттирикчилеринге уттундурбас программаларны чогааткан, олар уругларның хостуг үезин ёзулуг-ла ажыктыг болдурар. Ол программалар оон-даа солун болзун дээш “Билиг ниитилел янзы-бүрү хемчээлдиң алды төлевилелин хары угда кылган. Ол дээрге лекциялар, мастер-класстар, угаан сайзырадыр оюннар, кино көргүзүглери, эртем шенелделери-дир. Кадыкшыдылга организацияларының ажылдакчылары оларны боттары азы чалаткан лекторларның дузазы-биле эрттирип болурлар” — деп, Россияның «Билиг» ниитилелиниң чиңгине директору Максим Древаль демдеглеп турар.
Ооң шала бетинде РФ-тиң чырыдыышкын сайыды Сергей Кравцов уругларның чайгы дыштанылгазын болгаш кадыкшыдылгазын организастаар айтырыгларының талазы-биле Албаннар аразының комиссиязының чөвүлел семинарынга 2024 чылда уругларның дыштанылга болгаш кадыкшыдылга лагерьлеринге 5,3 сая ажыг уруглар кижизидилгениң чаңгыс аай программазының хемчеглеринге албан хаара туттунар дээрзин чугаалаан.
Бо чылын “Билиг” ниитилел бүгү чуртка, ооң иштинде Тыва Республикага база, аныяк российжилерниң дыштанылгазын организастаар. Регион азы кадыкшыдылга организация бүрүзү боттандырары-биле хемчеглерниң чаңгыс азы элээн кажын шилип алыр: Билиг. Маадырлар, Билиг. Депшилге, Билиг. Эртем, Билиг. Кино, Билиг. Оюн, Билиг. Лекторий, тураскаалдыг ай-хүннерге база күрүне байырлалдарынга лекциялар.
Россияның «Билиг» ниитилели школачыларга идепкей программазын “Россия” деп делгелгеге белеткээн. Июнь 4-те бо чырыдыышкын организациязы «Билиг”-биле дыштанылгалар» деп программаны ажылдадып киирер. Уругларны ВДНХ-ның девискээринге янзы-бүрү темага ажыктыг экскурсиялар, солун лекциялар, а ол ышкаш мастер-класстар манап турар. Ооң аңгыда, школачыларны культурлуг программа-биле база таныштырар — уруглар “Билиг” ниитилелдиң аалчылар хүлээп алыр черинге ажыл-хемчеглерге киржир. Аңаа оларны классиктиг чогаалдарның уран номчулгазы, концерттер болгаш шиилер манап турар.
Эрткен чылдың чайында Россияның “Билиг” ниитилели чурттуң уруглар лагерьлеринге 8,5 муң ажыг чырыдыышкын хемчеглерин эрттирген. Уруглар төптериниң чанынга спортчулар, артистер, сайгарлыкчылар болгаш өске-даа ажылдакчылар-биле чайгы үш айның дургузунда ужуражылгаларны 80 ажыг субъектилерге эрттирген. Ук хемчеглерниң дыңнакчылары болгаш киржикчилери 180 муң хире кижи болган.
А. ХЕРТЕК белеткээн.
«Шын» №40 2024 чылдың июнь 1