Российжи ниитилел “Билиг” хөй ниити организациязының төлээлери ТывКУ-га Нейрочетки, маркетинг база күш-ажыл хоойлузу: Билиг.депшилге деп аныяктар шуулганын организастап эрттирген. Аңаа психологтар, маркетологтар, сайгарлыкчылар, төлевилелдер удуртукчулары, хөй-ниити төлээлери сургуулдар-биле регионнуң бурунгаар хөгжүлдезиниң дугайын сайгарып, чугаалашкан.
Хемчегниң байырлыг ажыдыышкынынга Чазак Даргазының оралакчызы Орлан Сарыглар, ТывКУ-нуң ректору база РФ-тиң “Билиг” хөй-ниити организациязының Тывада салбырының удуртукчузу Ольга Хомушку, Социал политика болгаш күш-ажыл сайыды Эдуард Сандан, Өөредилге сайыдының бир дугаар оралакчызы Орлан Соян, Экономика хөгжүлдезиниң болгаш үлетпүрүнүң сайыдының оралакчызы Темир Таспанчик хүндүлүг аалчылар болганнар.
“Сайзырал”, “Депшилге”, “Бизнес болгаш стартап” деп үш аңгы темага ажылчын бөлүктер ажылдаан. Ол ышкаш шуулганның киржикчилеринге “Лекторларның лигазы” мөөрейиниң тиилекчизи Игорь Носов, Россияның экономиктиг хөгжүлде яамызының ВАВТ башкызы Алексей Закальскис, методизи Екатерина Сысоева, психолог Илья Благов, Skillbox методистериниң удуртукчузу Юлия Прокофьева, “Көдээ ажыл-агый банкызының” эргелекчизи Чинчи Сарыглар боттарының ажыл-агыйының дугайында илеткелдерни чоруткан.
Аныяктар аразынга депшилге болгаш хөгжүлде дугайында шуулганнарны 2022 чылдан тура, Россияның янзы-бүрү булуңнарында удаа-дараа эрттирип турар. Шак мындыг онлайн болгаш оффлайн шуулганнар үезинде аныяктар чурттуң улуг федералдыг компанияларының төлээлери-биле ужуражып, оларның чедиишкининиң төөгүзү-биле таныжып, боттарының билиглерин шылгап, резюме тургузарының болгаш ажылче кирип алырының арга-сүмелерин билип ап турарлар.