Тываның Таңды кожууннуң Бай-Хаак суурда чаа школа профугланыышкын программазын эртежик эгелээри-биле бешки класстың өөреникчилеринге бир дугаар авиация клазын ажыткан.
«Аныяктар болгаш уруглар» деп национал төлевилелдиң ачызында туттунган школа бо чылдың сентябрьда эжиктерин ажыткан. Чаа албан чери бодунуң ажылының үре-түңнелдерин көргүзүп эгелээни бо.
«Тува Авиа» авиакомпанияның ужудукчулары авиация клазының байырлыг ажыдыышкынынга видеоконференция дамчыштыр киришкен. Ан-2-ниң командири Василий Филенко, Тываның төөгүзүнде бир дугаар херээжен ужудукчу – экипажтың ийиги ужудукчузу Сайдаш Ооржак, Ми-8 вертолеттуң бортмеханиги Тумен-Мерген Самбыга боттарының арга-дуржулгазы-биле үлешкеннер. Оларның төөгүзү уругларга дириг үлегер-чижек болуп, күштүг сорукту берген.
«Силер республикага чаа угланыышкынны эгелеп турар-дыр силер. Дээр эрес-дидим болгаш эртем-билиглиг кижилерге ынак дээрзин утпаңар, ынчангаш бурунгаар-ла, өөренир-ле» – деп, Василий Филенко аныяк авиаторларга чугаалаан.
Регионнуң Орук-транспорт яамызының дыңнатканы-биле алырга, «Тува Авиа» авиакомпания Бай-Хаак суурнуң школазы-биле тускай угланыышкынныг класстың өөреникчилерге мергежилдиң чажыттарын херек кырында дамчыдып бээриниң талазы-биле дугуржулганы чарарлар.
Профессионал угланыышкынга белеткел программазы-биле школада аграрлыг болгаш инженер-технологтуг (дагжы) класстар база ажыттынган. Профугланыышкын ажылында ындыг хамаарылга регионнуң тускай төлевилели болур. Чаа класстарже кирери элээн каш чадалардан тургустунган. Өөреникчилер командалыг ажылдаарының мөөрейлеринге киржип, эртем-билигни чедип алырын аазаан, байырлыг даңгыракты бергеннер.
«Бөгүн бистиң ажы-төлүвүс келир үеже бичии боорда, чугула базымны кылган. Бо класста анаа-ла өөреникчилер эвес, а каш чылдар эрткенде, ёзулуг мергежилин шилип алган, төрээн Тывазынга херектиг специалистер апаар ужурлуг шын социал чаданы эрткен кижилер үнер» – деп, школаның директору Ольга Санчы демдеглээн.
Тускай класстарның өөреникчилери шилип алган угланыышкынынга хамаарышкан эртемнерни ханы өөренип, профессионалдарның мастер-класстарынга киржип, тускай компанияларже аалдап чедерлер. Ылаңгыя авиация клазын ажытканы республиканың транспорт болгаш кадрлар инфраструктуразын хөгжүдериниң стратегтиг сорулгазын боттандырып турар.
А. МОНГУШ.
Чурукту ТР-ниң Чазааның парлалга албанындан алган.
“Шын” №49 2025 чылдың декабрь 18