Удавас школаның эргинин бир дугаар артап кирер бирги классчы өөреникчилерге «Үжүглелдиң бижилгези» деп дузалал өөредиглиг кыдырааштарны чаарттынган өңнүг хевирге парлап үндүрген. Ук өөредилге-методиктиг материалды бодунуң үезинде «Үжүглел» номунга демнежилге кылдыр ССРЭ-ниң улустуң башкызы Арыя Араптановна Алдын-оол ажылдап кылган турган.
«Үжүглелдиң бижилгезин» тыва дылда методиктиг дузаламчыларның «хоочуну» дизе, чазыг болбас. Ону республиканың хөй-хөй бирги классчылары ажыглап, бижип өөренип, эртем-билигниң оруунче чедип кирген буянныг өңнүү деп бедии-биле үнелеп чоруур.
Чаарттынган кыдыраашты Тываның Ю.Ш. Кюнзегеш аттыг ном үндүрер чери чаа өөредилге чылының бүдүүзүнде парлап үндүрген. Ону Кызыл хоорайның Щетинкин болгаш Кравченко кудумчузунуң 57 дугаар бажыңында ном делгүүрүнден садып ап болурун ада-иелерге Национал школа хөгжүдер институт дыңнадып тур. Кыдырааштың өртээ — 150 рубль.
Төрээн дылынга чаштарны шын бижип өөредири – тыва дылга ынакшылдың болгаш хүндүткелдиң демдээ.
Национал школа хөгжүдер институттуң медээзи болгаш чуруу.
“Шын” №28 2025 чылдың июль 24