Красноярск хоорайга июнь 29-тан июль 2-ге чедир Бүгү-россия чергелиг сайгарлыкчылар шуулганы болуп эрткен. Ооң кол эрттирикчилери “Красноярск крайның бизнести сайзырадыр төвү болгаш биче кредит компаниязы” (Красноярск крайның “Мээң бизнезим” төвү) болган.
Бо шуулганга кол чугаалашкан айтырыгларның бирээзи даштыкы күрүнелерде бүдүрүп кылган хереглел барааннарын солуур аргалары, чуртувуста бүдүрүп турар барааннарның хереглели, шынары дээш өске-даа.
Аңаа Россияның бүгү регионнарындан чыглып келген сайгарлыкчылар болгаш бараан бүдүрүкчүлери, чуртта билдингир фирмаларның төлээлери, удуртукчулары, аңгы-аңгы адыр аайы-биле сайгарлыкчы чоруун сайзырадып турар хууда сайгарлыкчылар дээш өскелер-даа чыглып, таныжып, арга-дуржулгазын солушкан. Аңаа Тывадан хууда сайгарлыкчылар – ыяш болбаазырадыр талазы-биле ажылды чорудуп турар хууда сайгарлыкчы Анатолий Ландык, хымыс кылыр болгаш тараа өстүрер талазы-биле ажыл-агыйлыг “Сириус” КХН-ниң удуртукчузу Вячеслав Сарыглар, чазанылга ажыл-агыйлыг Хаяда Саая, “Тыва полиграф” КХН-ниң удуртукчузу Аяс Чимит-оол, демирден соп кылыр ажыл-агыйны сайзырадып турар Наталья Полева, тудуг талазы-биле ажыл-агыйлыг Айдың Кара-Сал, “Востоктудуг” КХН-ниң чиңгине директору Рустам Монгуш киришкеш келген. Тывада Сайгарлыкчыларны деткиир фонд бодунуң сайгарлыкчыларынга кончуг ажыктыг улуг шуулганга киржир деткимчени берген.
Баштайгы хүнде Шуулган киржикчилеринге Красноярск хоорайга янзы-бүрү бүдүрүлге черлеринче экскурсиялар болгулаан. Тываның сайгарлыкчылары Красноярскының өңнүг металлдар болбаазырадыр заводунуң ажыл-чорудулгазы-биле таныжар аргалыг болганнар. Үш муң ажыг ажылдакчылыг улуг бүдүрүлгениң ишти-даштының арыг-силии, ажылдаарынга эптиг кылган бүгү байдалдарның онзазын, эптиин олар эскерип, магадап көрген болгаш алдындан кылыгларны канчаар кылып турары, сая-сая рубль өртектиг алдын слитоктарны холга тудуп, сонуургаанын фондунуң ажылдакчызы дыңнаткан.
Дараазында хүннерде Шуулганның кол ажылы эгелээн. Аңаа чугаалашкан, көдүрген айтырыглары, шынап-ла, сайгарлыкчыларга кончуг ажыктыг болган. Чижээ, тудуг талазы-биле алырга, даштыкыга кылган тудуг материалдарын ооң мурнунда чагыдып, хереглекчилерге чедирип берип турган фирмалар, ам шак-ла ындыг, шынар талазы-биле бичии-даа дудак чок барааннарны Россияда кылып турар деп билип алганнар. Ол ышкаш Россияда бүдүрүп кылып турар барааннарны чүгле даштыкыже үндүруп турган фирмалар, компаниялар ам чурт иштинге чоннуң хереглелин хандырар ажылды идепкейлиг эгелээри-биле Форумга келген чамдык хереглекчилер болгаш хандырыкчылар-биле кады ажылдажылганың керээлерин чарып алган. Тываның сайгарлыкчылары база боттарының чорудуп турар ажыл-агыйынга хамаарылгалыг фирмалар, компаниялар төлээлери-биле таныжып, удур-дедир деткимчелиг кады ажылдажылга дугайында ажыктыг чугааларны кылганнар.
Кызылдан хууда сайгарлыкчы Айдың Кара-Сал:
– Бир дугаарында, солун хемчегге киржир арганы берген Тываның Сайгарлыкчыларны деткиир фондузунга четтиргеним илередир-дир мен. Бодумга ажыктыг хөй чүүлдерни билип алдым. Ол ышкаш тудуг ажылынга чугула херек чамдык материалдарның бүдүрүкчүлери-биле амы-хууда таныжып ап, моон-даа соңгаар кады ажылдажылганы чорудары-биле ажыктыг чугаалажыышкыннарны база кылыр аргалыг болдум. Чаа арыннар, чаа аргалар кезээде ажылды улам сайзырадырынга рольдуг болур. Ынчангаш шак мындыг бизнес-миссияларже республиканың сайгарлыкчыларын удаа-дараа чорудуп турар болза, ажыктыг болур деп санаар-дыр мен – деп, ол чугаалады.
Ниитизи-биле болган форумга Россияның бүгү регионнарындан келген сайгарлыкчылар, бараан бүдүрүкчүлери болгаш хереглекчилер мөөңнежип, чурттуң экономиктиг сайзыралынга деткимчени көргүзери-биле шупту демниг ажылдаар сорулганы салып, тараан.
ТР-де Сайгарлыкчыларны деткиир фондунуң парлалга-албаны.