Шаанда АССР үезинде Тывага тараа тарылгазы кончуг шалыпкын, дүжүткүр чораан. Тыва хлеб-биле бодун хандырбышаан, соңгаар үндүр сөөртүп турган. Тараа тарыттынмас, дүжүт алдынмас деп санап турган черлерден кончуг эки дүжүттү ажаап ап эгелей берген.
Барынмаа Анандович Маады 1926 чылдың май 12-де Тыва Арат Республикага төрүттүнген. 1942 чылда "Хадың" колхозунга ажылдап эгелээн. Сөөлүнде "Хадың" колхозун "Кочетов" колхозу кылдыр эде адаан. 1944–1945 чылдарда Туран хоорайга механизаторлар курузунга өөренген. Өөредилгезин дооскаш, колхозунга чанып келгеш, бир чыл болганда, колхозтуң эң-не тергиин механизатору апаргаш, комсомолчу аныяктар звенозун удуртуп эгелээн. Барынмаа Маадының удуртканы звенога Даштыг-Ужук деп черде шөлдү онааган. 1947 чылда ооң звенозу бир гектардан 28 центнер, а 1948 чылда гектардан 30,5 центнер тараа дүжүдүн ажаап алган.
1949 чылдың июнь 10-да ССРЭ-ниң Дээди Совединиң Президиумунуң айыткалы-биле Барынмаа Анандович Маадыга Социалистиг Күш-ажылдың Маадыры атты, Ленин орденин база «Серп болгаш Молот» алдын медальды тывыскан.
“Шын” №77 от 2024 чылдың октябрь 9