Сентябрьда диңмирээшкин, кызаңнаашкынныг чаъс узун болгаш чылыг күстү, чымчак кышты оштаар.
Бир эвес хадыңның бүрүлери шыпшык бажындан эгелеп саргарып эгелээр болза, час эрте дүжер, а адаандан эгелээр болза, час орайтаар.
Сентябрь эгезинде ээремчик дузаа көвей болур болза, күзүн аяс болгаш кургаг хүннер хөй болур.
Бир эвес черлик кастар ам-даа ужуп чорбаан болза, кыш орай дүжер болгаш чылыг болур.
Өл-шык чай болгаш чылыг күс узун кышты оштаар.
Эрте чагган хар – эрте час.
Азырал куштар бажын чалгын адаанче суп турар болза, соор.
Хады болгаш шиви чочагайлары көвей болза, кыш соок болур.
Шивиниң чочагайлары адаанга хөй болур болза, соок эрте дүжер, а кырынга хөй болур болза, кыштың дурту кыска болур.
Сентябрьда мөөгү дүжүдү хөй болуру дээрге-ле хары улуг кыш үр турар дээни ол.
Күжүгеннер үңгүрүнче хөй сиген дажып алган болза, кыш соок болур.
Дииңнерниң үүжези көвей болза, соок кыш узун болур.
Пөш тооруу хөй, ынчалза-даа мөөгү эвээш болур болза, кыжын хар улуг болгаш соок дыңзыг болур.
Бир эвес башкы хар өл болгаш доң черге дүшкен болза, олчаан чыдар, а кургаг черге дүшкен болза, дораан эрип каар.
Диңмирээшкин октябрьда-даа дыңналып каап турар болза, кыш чылыг болгаш хар чуга болур.
Куштар черже чоок, чавыс кылдыр ужар болза, кыш эрте дүжер болгаш соок болур, а бедик ужар болза, орай кыш чылыг болур.
Надежда КУУЛАР.
Чурукту ГигаЧатка чураан.
“Шын” №35 2026 чылдың сентябрь 10
"Шын" солуннуң МАХ-каналынга каттыжыңар: max.ru/channel_shyn