Чоокта чаа «Шын» солуннуң социал четкиде арнынга «Харыысалга кымдал?» деп материал үнерге, ооң адаанда хөй-ле айтырыглар, санал-оналдар бижээнин номчукчулар эскерген боор. Ынчангаш чоннуң салган айтырыгларынга харыылап бээрин «Транспорт сервизи болгаш төлевилел» күрүнениң унитарлыг бүдүрүлгезиниң («ТСП» МУБ) даргазының оралакчызы Родион Тимоходцевтен дилээн бис.
– Регионалдыг оператор канчаар ажылдап турар ирги?
– Регионалдыг оператор чүгле мэрияның тургускан коммуналдыг кадыг бок чыыр черлеринден бокту чыып ап турар. Хуу өнчү девискээрлеринде коммуналдыг кадыг бок чыыр черлер Кызыл хоорай чагыргазының харыысалгазында. Мэрия бункерлерниң турар черлерин тодарадып, оларны үндүрер дугайында шиитпирни хүлээп алыр. Ынчангаш чурттакчы чон боттарының девискээринге коммуналдыг кадыг бок чыыр бункер тургузары чугула деп санаар болза, хоорай чагыргазынче билдириишкин азы бижимел санал киирер.
Хууда бажыңнар даштында контейнерлерде бокту үндүрерин чүгле «ТСП» МУБ-туң диспетчер албаны таварыштыр 8-(39422)-5-39-10 дугаарлыг телефонче долгааш, киирген чагыг ёзугаар алгаш баар.
– Бок сөөртүп турар регионалдыг операторнуң ажылдаар шактарын кайыын көрүп ап болурул?
– Чон-биле ажылдап турар килдис Кызыл хоорайның Кочетов кудумчузунуң 30 дугаарлыг бажыңында. Ажыл хүннеринде эртенгиниң 08.00 шактан кежээ 18.00 шакка чедир дүъштеки чапсар чокка ажылдап турар. Чүгле пятницада чартык хүн ажылдаар.
Юридиктиг албан черлери-биле азы хууда сайгарлыкчылар, организациялар-биле керээ чарар килдис ол-ла адресте 15 дугаар кабинетте хүлээп турар. Ажылдаар шактары база шак-ла ындыг. Төп офис Кызыл хоорайның Сукпакская кудумчузунуң 4 дугаар бажыңында. Ажылдаар шактары: понедельник-четверг хүннеринде эртенгиниң 8.00 шактан 17.00 шакка чедир ажылдаар. 12.00-13.00 шак аразында дүъштеки чапсар. Пятницада чартык хүн ажылдаар. Контейнерде бокту үндүр сөөртүрери-биле чагыг хүлээп алыкчылары эртенгиниң 8.00 шактан кежээ 17.00 шакка чедир хүлээр. Чүгле пятницада чартык хүн ажылдаар.
– Хууда бажыңының даштында бок октаар контейнери чок болза, богун шоодайлааш, регионалдыг оператор алгаш баар кылдыр белеткеп болур бе?
– Бокту шоодайлаары дээрге тус чер чагыргаларының бок чыыр черлерни турум тургузуп алырынга чедир көрдүнген хемчег-дир. Өвүр кожууннуң Хандагайты болгаш Солчур сумуларының чону богун шоодайлааш, регионалдыг операторга чүдүрүп турар. Ынчалза-даа үргүлчү-ле ол арганы ажыглаары болдунмас. Ынчангаш тус черлерниң чагырга черлери контейнерлер болгаш бункерлер айтырыын дарый шиитпирлээр ужурлуг.
– Бокту кижи боду полигонче төптер болза кандыгыл?
– Хууда кижилер бодунуң богун полигонче үндүр сөөртүп болбас. Ол дээрге федералдыг хоойлунуң негелдези-дир. 1998 чылдың июнь 24-те үнген «Бүдүрүлге болгаш хереглел боктарының дугайында» 89 дугаарлыг федералдыг хоойлу езугаар регионалдыг операторнуң ажылдап турар девискээринде коммуналдыг кадыг бокту чыырын, сөөртүрүн, болбаазырадырын, катап ажыглаарын, октаарын база тургузарын чүгле ол организация харыылаар. 2022 чылдың январь 1-ден эгелеп бүгү Тывада коммуналдыг кадыг бокту болбаазырадыр талазы-биле регионалдыг чаңгыс аай оператор харыылаар апарган.
– Бок төгер контейнерни кижи боду хайындырып кылып алыр болза кандыгыл? Кижи бүрүзү 21000 рубль-биле контейнер садып шыдавас болгай.
– «ТСП» МУБ организацияларга-даа, хууда кижилерге-даа контейнерлер сатпайн турар. Контейнерни садар-сатпазы кижи бүрүзүнүң хууда шиитпири-дир. Хууда контейнерлерден бок үндүр сөөртүрү түр када база регион операторунуң хүлээлгези эвес дээрзин утпаңар. Кожуун төптеринге болгаш сумуларга бок төгер контейнер болгаш бункер айтырыын тус черлерниң чагырга черлери харыылаар.
– Чер бажыңнарның чурттакчылары хөй аал чурттаар бажыңнарның девискээринде бок төгер контейнерлерже богун октап болур бе?
– Хөй аал чурттаар бажыңнарда контейнерлерниң саны чүгле ол чурттакчыларга хамааржыр. Ынаар октаар болза, чурум үрээн болур.
/ Айдың ОНДАР белеткээн.
Чурукту маадырның архивинден алган.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...