Тываның Баштыңы Владислав Ховалыг Москвага ажыл- албан үезинде Россияның бойдус курлавырларының болгаш экология сайыдының оралакчызы Денис Буцаев-биле ужурашкан.
«Бок-биле ажылдаар турум системаны тургузарынче болгаш регионалдыг инфратургузугну чаартырынче угланган төлевилелдерниң аргаларын болгаш акшаландырыышкынын дүүштүрер талазы-биле тодаргай базымнарны сайгарып чугаалаштывыс»– деп, регионнуң удуртукчузу социал четкилерде бодунуң албан ёзузунуң блогунда дыңнаткан.
Бок чыыр контейнерлер садып алыры көвүдээн Россияның регионнар санынче Тыва база киргени билдинген. Ол даңзыда Карелия биле Бурят республикалар, Еврей автономнуг область база Самара, Новосибирск, Смоленск, Новгород, Калининград, Псков областар база Забайкалье, Красноярск, Краснодар болгаш Пермь крайлар бар. Россияның экологтуг операторунуң специалистери бо медээни РФ-тиң Чазааның Координация төвүнүң шөлүнге болуп эрткен кадыг коммуналдыг боктар-биле ажылдаар системаны организастаарының штаб хуралынга таныштырган. Эксперттер чурттуң аңгы-аңгы регионнарында кадыг коммунал боктар-биле ажылдаар адырда амгы байдалды сайгарган.
Тываның Арга-арыг болгаш бойдус ажыглал яамызының дыңнатканы болза, амгы үеде Кызылда болгаш республиканың кожууннарында боктар чыыр 4600 контейнер салдынган. “Кадыг коммунал боктар бүрүткели” федералдыг күрүнениң информация системазында 3247 контейнер шөлчүгештерин киирген. 162 шөлдү бо чылын кылыр. Бо чылын 486 контейнерни садарын планнаан турган, оларның 354-үн салган, 260-ын кожууннарже дамчыткан. Регионалдыг оператор сентябрьда Кызылдың хөй аалдыг бажыңнар девискээринге боктар чыыр 108 чук саваны саткаш, салыр планныг.
Бо хүнде «Транспорт ачы-дузазы болгаш төлевилел» күрүнениң унитарлыг бүдүрүлгези республиканың 14 муниципалдыг тургузуун база Кызыл биле Ак-Довурак ийи хоорай округун хандырып турар. Регионалдыг чуртталга-коммунал ажыл-агый яамызының сан-чурагайы-биле алырга, бо чылдың чеди айында чурттакчылыг черлерден 50515,05 тонна бокту, азы 336767 куб метр бокту үндүр сөөрткен.
Оон аңгыда Тываның Баштыңы Владислав Ховалыгның даалгазы-биле республикада коммунал техника автопарыгын көвүдедир ажыл доктаамал чоруп турар. Регионнуң удуртукчузу чурттакчы чонунуң кадыг боктарын чыырынга таарымчалыг байдалдарны тургузар даалганы Чуртталга-коммунал ажыл-агый яамызы биле регионалдыг операторга берген.
2025 чылда «Тыва Республиканың чуртталга-коммунал ажыл-агыйының шынарлыг болгаш идегелдиг ажылын бедидери” күрүне программазы-биле 210 сая рубльге 21 санныг техника аймаан садып алыры планнаттынган. Чүгле бо чылдың бирги чартыында регионалдыг операторнуң автопарыгында бок чүдүрер 24 чаа автомашина немешкен. Садыглажылганың түңнелинде камнап алган акша-хөреңгизи-биле үш санныг техниканы база немей садып алган. Көдээниң чурттакчыларын хандырар дээш, кожууннарже алды тускай автомобильдерни хөлезилеп, хаара туткан. Амгы үеде регионалдыг операторнуң материал-техниктиг хандырылгазында 60 техника бар.
Чуртталга-коммунал ажыл-агый яамызының дыңнадыы-биле алырга, 2026 чылда – 14, 2027 чылда 13 тускай автомобильди садып алыры планнаттынган.
ТМГ-ниң медээлеринден.
Чурукту интернет четкизинден хоолгалаан.
«Шын» №39 2025 чылдың октябрь 9