Кызылга Российжи сайгарлыкчы чорук хүнүнге тураскаадып, ажыл-биле бот-хандыртынган кижилерниң "Стартаптан быжыг бизнесче" деп лозуңнуг III республика шуулганы болуп эрткен.
Тыва Республиканың Экономиктиг сайзырал болгаш үлетпүр яамызы биле Сайгарлыкчы чорук деткиир фонд ажыл-биле бот-хандыртынар институтту тайылбырлап, күрүне деткимчезиниң хемчеглериниң дугайында медээлерни база бизнести чорударының эге билиглеринге улуг хемчегни организастаан.
Бо чылын шуулганга республиканың аңгы-аңгы булуңнарындан 170 кижи бүрүткеткен. Бодунуң херээн эгелевээн, сонуургап келгеннер база бар болган. Ол ышкаш шуулганның болгаш ооң организакчыларының социал четкилерде арыннарында дорт дамчыдылгага элээн каш чүс кижи коштунуп, онлайн хемчегге киришкен.
Тываның чедиишкинниг сайгарлыкчылары хемчегниң спикерлери болуп киржип, эгелеп чоруур коллегаларынга чыгдынган арга-дуржулгазын дамчыткан. Чижээ, "Арыг-Силиг" деп хеп чуур чер четкизиниң үндезилекчизи, аныяк сайгарлыкчы Чингиз Чыпсынак, 10 чыл сайгарлыкчы стажтыг, Pastabar, Рыбаlove кафелерниң база "Арт" кофейняның тургузукчузу Алдынай Монгуш боттарының төөгүзүн сонуургаткан.
Сайгарлыкчы, маркетолог Айлаң Судер-оолду, сайгарлыкчыларның дагдыныкчызы Валерий Сарыгларны база бизнеске күрүне деткимчези бээр адырда эксперт Айгуш Сатты эксперттер кылдыр чалаан.
Тыва Республиканың Экономиктиг сайзырал болгаш үлетпүр яамызының, Күш-ажыл болгаш социал политика яамызының, Социал фондунуң база Үндүрүг албанының төлээлери бодун ажыл-биле хандыртынган кижилер-биле ужурашкан.
Шуулганның киржикчилеринге грант дузазы-биле бодунуң бизнес-идеяларын канчаар боттандырарын, чижикчилер аразындан ылгалып үнериниң аргаларын, бизнести калбартырының арга-хевирлерин, бизнести хандырар инвестицияларны хаара тударын тайылбырлаар. Сөс алганнар боттарының практиказындан чижектерни киирип, тайылбырны бээр.
Тываның экономиктиг сайзырал сайыдының оралакчызы Темир Таспанчиктиң бодалы-биле алырга, шуулганның киржикчилери сайгарлыкчы чорук адырында боттарының арга-дуржулгазын сайзырадып, чаа билиглерни алганнар. Оралакчы сайыттың бодалын шуулганның онлайн-шөлчүгежинде киржикчилерниң арттырган үнелээшкиннери бадыткаан.
Регионалдыг Экономиктиг хөгжүлде яамызының медээзи-биле алырга, бөгүн Тывада ажыл-биле бот-хандыртынган 12427 кижи бүрүткеттинген. Чыл дургузунда оларның саны ийи катап көвүдээн, азы 6 561 кижиге.
Регионнуң Чазаа биле ТР-ниң Экономиктиг сайзырал яамызы ол институтту хөгжүдеринге “Биче болгаш ортумак сайгарлыкчы чорук болгаш хуу сайгарлыкчы эгелээшкиннерни деткиири” национал төлевилел-биле күрүне деткимчезиниң комплекстиг хемчеглерин боттандырып турар. Тыва Республиканың Сайгарлыкчы чорукту деткиир фондузу боттарын ажыл-биле хандыртынар хамаатыларга чиигелделиг чээлилерни берип, регионалдыг Магадылал фондузу чээли болгаш өске-даа саң-хөө курлавырларын алырынга дагдыныкчылаарынга дузалажып турар. Республиканың "Мээң бизнезим" төп боттарын ажыл-биле хандыртынган кижилерниң ажы-чорудулгазын база продукциязын/ачы-дузазын брендилеп, нептередириниң, электроннуг садыг шөлчүгештеринге база делгелге-садыглаашкын хемчеглеринге салырының чарыгдалдарын төлеп бээринге, ол ышкаш өөредилге семинарлары, шуулганнар база арга-дуржулга солчулгалыг регионнар аразының бизнес-миссияларын организастаарынга белен.
Чүгле эрткен чылын Тываның бодун ажыл-биле хандыртынган кижилерге нацтөлевилелдерден 11 млн рубль акшага күрүне деткимчезин берген.