Шаандан тура өгбелерим сүзүглели
Шакьямуни Будда Бурган делегейни
Кажанда-даа кагбас болзун, кагбас болзун,
Кезээ шагда бистиң-биле кады чорзун!
Камгалалды кижи черле төөгүвүсте
Хүнден, айдан, агаар-бойдус черивистен,
Херелденген Будда Бурган чырыткывыстан
Күдүк базып чалбарааштың дилеп чораан.
Бүрүн эчис сорулгалыг амыдыралче
Сагыш-сеткил күжүм немеп көдүрүп кээр,
Сүлде-сүзүүм ала-чайгаар бедидиптер
Судал-чүрээм – Сарыг шажын, делгере-ле!
Өртемчейде чүдүлгелер аразында
Өөредии эң-не баштай быжыгланган,
Энерелдиг сеткил күштүг Улуг Будда
Эртинези мөңге шагда алдаржы-ла!
Хемермаа САЙЗАН-ООЛ,
ТР-ниң чогаалчылар эвилелиниң кежигүнү, Национал театрның актрисазы.
«Шын» №18 2025 чылдың май 15