БОЛГАН ТАВАРЫЛГА
Аныяк эр почта салбырынга келген чагаалар ылгаар ажылдыг турган. Ооң хү- лээлгези келген чагааларның адрестерин эки ылаптап, кайы хоорайже чорударын тодарадыр турган. Бир-ле хүн хөй чагаалар аразындан чедер черин хол-биле бижип каан чагаа тып алган. Ол чагааның даштында «Бурганга» деп бижип кааны демги эрниң сонуургалын дораан-на оттурупкан. Бир-тээ ол чагааны дедир эгидер ужурга таварышкан-даа болза, иштинде чүнү бижип каанын билип алыксаан сеткили номчуурунче ала-чайгаар албадапкан. Ажыл шагы доостуру билек, чагааны номчуп көрген.
«Бурганым! Шынап-ла, бо өртемчейде бар улуска дузаңар чедирип чоруур болзуңарза, меңээ дузалап көрүңерем. Мен 83 харлыг, чааскаан чурттап турар мен. Бурунгу хүн бир-ле кара сагыштыг кижи сумкамны оорлап алгаш барды. Ооң иштинде мээң пенсиям болур 100 доллар турган чүве. Келир айга чедир канчаар чурттаар аайын тыппас-тыр мен.
Эң-не чугула чүүл — келир улуг-хүнде Авалар хүнү болур. Ол хүн чоок эдержип чораан ийи эжимни кежээки чемче чалап каан мен. Аъш-чем садар акшамны оорладып алганымга дыка муңгарап олур мен. Мени карактап көөр чоок улузум, дөргүл-төрелдерим чок болганы-биле эң сөөлгү бүзүрелим болур Бурган силерден дуза дилеп бо чагааны бижидим. Меңээ дузалажып көрүңерем» деп бижип каан болган.
Аныяк эр кырганның чагаазын номчаан соонда, сагыжы аарып, кады ажылдап турар эш-өөрүн чыып алгаш, херектиң ужурун чугаалааш, номчуп берген. Эш-өөрү кырган-авайга 100 доллар чыып бээр түңнелди үндүрген. Бирээде, үе кыска артканы-биле, ийиде, эң-не кол чүүл улуг-хүн келбээнде, чыггаш, чедирери болур. Оларның чыгган акшазы мугур 96 доллар болган. Чыгган акшазын чагаа хавынга суккаш, кырган-авайның чагаада айыткан адрезинге чедирип бергеннер. Ол хүн кырган-авайга дыка-ла өөрүнчүг хүн болган. Бурган ээ көрүнгени ол.
Кырган-ава өөрүшкүзүн канчаар илередип бижиир ирги дээш шупту почта салбырының ажылдакчылары манааш турупкан.
Каш хонганда, кырган- авайдан «Бурганга» деп адрестээн чагаа келгенин демги эр эштеринге өөрүшкүлүү кончуг дыңнаткан.
Ажылдакчылар-даа дораан чыглып келгеш, номчуй-ла бергеннер.
«Күжүр, Бурганым! Силер меңээ кандыг улуг аас-кежикти хайырлаанын чугаалаар-даа сөс тыппас-тыр мен. Силерниң буянныг сеткилиңер кайы хире делгем деп чүүлдү медереп билдим. Силерниң чоруткан акшаңар-биле амданныг аъш-чем садып алгаш, эштеримни чалап, кежээки чем чип, Авалар хүнүн уттундурбас кылдыр байырладым. Силерниң белээңер дугайында эштеримге чугаалап бердим. Арай бүзүрексевес чорду. Силерге чугаалаар дээш уткан-дыр мен. Силерниң чоруткан акшаңардан 4 долларны силер биле бисти харылзаштырганы дээш ирги бе, почта ажылдакчылары деп мелегей чүвелер сывырып алгаш барган болду. Олардан өске аңаа кым-даа дегбес ужурлуг» деп бижээн болган.
Интернет четкизинден очулдурган.
Чурукту интернет четкизинден алган.
"Шын" №36 2023 чылдың май 20
Бурганче ыткан чагаа
21 мая 2023
32