Буянныг ажылдың кижилери

Республиканың “Деткимче” төвү 2003 чылда ТР-ниң Чазааның доктаалы ёзугаар тургустунган. Социал төп бо чылын 20 чыл оюн демдеглеп турар.

Найысылал Кызылдың улусчу чогаадылга бажыңынга аңаа тураскааткан юбилейлиг концертти эрттирген. Ук концертче кирери халас-даа болза, чонну боттарының арыг сеткилинден буянны кылзын дээш, өргүл-сөң хааржакчыгажын ында тургускан, төптүң агар санын база ында айтып каан. Аңаа чыгдынган акша-хөреңги кадыы кызыгаарлыг болгаш назы-хары улгады берген кижилерниң чогаадыкчы шөлчүгежин тургузарынче кирген. Ук ажылды чорудар оран-саваны Кызыл хоорайның эрге-чагыргазы “Найысылал” культура бажыңында аңгылап берген. Ол ышкаш Улусчу чогаадылга төвүнүң фойезинге бүгү республиканың кадыы кызыгаарлыг кижилериниң кылган ажылдарының делгелгезин база организастаан.
Байырлалды организастап эрттиреринге Күш-ажыл болгаш социал политика яамызынга хамааржыр социал албан черлери болгаш социал дуза алыкчылары киришкен дээрзин “Деткимче” төвүнүң директору Буян Ооржак демдеглээн.

Ол ышкаш социал төптүң 20 чылдаан байырлалын уткуштур ук адырның 30 ажыг тергиин ажылдакчыларын шаңнап-мактаан. Арткан шаңналдарны июнь 8-те Социал ажылдакчылар хүнүнде тыпсырын аазаан.

Ук албан чериниң ажылдакчыларының кол сорулгазы амыдырал-чуртталгада холу салдынып, эртенги хүнге бүзүрелин чидирипкен, кыдыындан деткиптер кижилери чок болганындан амыдыралы чогувайн чоруур кижилерге дузалажып, деткиири болур.

Төптүң ажыл-ижи чааскаан чурттап турар кадыы кызыгаарлыг, назы-хары улгады берген кижилерниң бажыңында ажыл-агыйын кылчып бээринче база угланган болур. Ол ышкаш тодаргай чурттаар чери чок болгаш хосталгазын казыттыргаш, хосталып үнүп келген кижилерге база дузалажып турарлар. “Деткимче” төвүнде кадыы кызыгаарлыг болгаш назы-хары улгады берген кижилерниң хостуг үезин ажыктыг эрттирери-биле база амыдыралын экижидери-биле янзы-бүрү угланыышкынныг шөлчүгештер ажылдап турар. Кылаштаар арга-шинээ чок кижилерге социал такси бары база өөрүнчүг. Дуза хереглээн чаңгыс чер чурттугларынга херек кырында оларның чедирген дузазын санап четпес. Ооң ажылдакчылары 20 чыл дургузунда чаңгыс-даа минута эрттирбейн, дуза херек кижилерни чылыг-чымчак сөстер, кичээнгей болгаш ёзулуг каракка көскү ажылдар-биле деткип, боттарының ажылын кылып чорудуп турарлар.

“Деткимче” төвүнде ёзулуг-ла быжыг туруштуг, шыдамык кижилер ажылдап турар. Оларның аразында 2009 чылда ук төптүң социал дуза алыкчызы турган Альберт Маадыр амгы үеде ында массажист болуп ажылдап турар. “Ол үеде төпке тодаргай чурттаар чери чок кижилер хөй турган. Шак ындыг орукту бодум чурттап эрткен болгаш, оларның балыгланган сагыш-сеткилин дыка эки билир мен. Ынчалза-даа кижи бодунга “Мен кым мен?”, “Келир салгалга чүнү арттырар мен?”, “Олар мени кандыг кижи кылдыр сактып артарыл?” деп айтырыгларны катап-катап салып, боданып тургаш, ынчан берге байдалдан уштунуп ап болур” – деп, ол чугаалаан. Төптүң ажылдакчыларынга эки орукче киирип дузалашканы дээш, ырак-чооктан өөрүп четтиргенин илередип чоруурлар хөй.

Байырлыг концертти чаныш-сыныш чок, быжыг тура-соруктуг кадыы кызыгаарлыг салым-чаяанныг кижилер республиканың “Деткимче” төвүнге, чаагай сеткилдиг ажылы дээш өөрүп четтиргенин болгаш хүндүткелин илереткеннер. Төптүң ажылдакчылары база социал дуза алыкчыларын деткип, оларның-биле кады салым-чаяанын көргүскеннер. Оларның аразында хөй-хөй бүгү-российжи, делегей чергелиг мөөрейлерниң лауреады, дипломантызы Лопсан Мундукай, “Алло, салым-чаяанныгларны дилеп тур бис” деп кадыы кызыгаарлыг элээдилер мөөрейиниң дипломантызы Ким Алдын-Херел, Параолимпиадаларга шаңналдыг черлерни чаңгыс эвес ээлеп чоруур ча адыкчызы Александр Бюрбю, кадыы кызыгаарлыг спортчулар аразында Делегей чемпионадының мөңгүн медалының эдилекчизи Руслан Очур, Бүгү-российжи кулаа дыңнавастар ниитилелиниң ТР-де салбырының бот-чогаадыкчы артистери Шолбан Монгуш, Аржаан Ооржак, хөй-хөй бүгү-российжи мөөрейлерниң киржикчизи Ариана Хертек, “Дең аргалар девискээри” деп республика чергелиг театр уран чүүлүнүң фестивалының тиилекчизи Юлия Донгак дээш кымнарны чок дээр. “Эдегей” танцы-сам болгаш костюм театрының кадыы кызыгаарлыг модельдериниң чаныш-сыныш чогун демдеглевес арга чок.

/ Чыжыргана СААЯ.

"Шын" №27 2023 чылдың апрель 15