“Буянныг чүректер” уругларга кайгамчыктыг белекти сөңнээн

Январь 5-те “Тываның буянныг чүректер” шимчээшкининиң идепкейжилери “Буянныг чорукче базым” деп республика чергелиг акцияга киржип, Кызылдың Өг-бүлелерге болгаш уругларга социал дуза төвүнде турар уругларга байырлыг хемчегни организастаан.

Идепкейжилер аниматорларны чалап алгаш, уругларга солун хемчегни эрттирген. Оларның удуртукчузу Артыш Монгуш уругларга ачы-дуза чедирер ажылдың чугулазын, ол ышкаш «Добро.ру» платформаның дугайында база аныяктар ынаар кирип алырга, оларга ажыктыг аргалар барын дыңнаткан.

“Эң-не кол чүүл бөгүн бис уругларга экини болгаш чылыг-чымчак сеткил-хөөннү сөңнеп турар бис. Уругларга улуг улустуң талазындан деткимчени болгаш кичээнгейни сөңнээрге, олар аажок өөрүүрлер” – деп, Артыш Монгуш демдеглээн.

Оон аңгыда, шимчээшкинниң удуртукчузу “Буянныг чорукче базым” деп акцияга хамаарышкан дараазында боттандырар сорулгалары-биле үлешкен.

“Ук төлевилел-биле бис дараазында боттарывыстың деткикчилеривис-биле кады кожууннарже үнүүшкүннерни кылып, буянныг чорук кылырының дугайында уругларга чугаалап, боттарын ук адырга оларның херектиг угланыышкынынга сайзырадып болурун чугаалап чедер бис. Чүге дээрге, эки чүүл кылыры аныяктарга хөй-ле оруктарны ажыдар” – деп, Артыш Монгуш үлешкен.

Ол хүн Өг-бүлелерниң болгаш уругларга социал дуза төвүнге 3 хардан 16 харга чедир 29 уруг турган. Чаа чыл дыштанылгаларының үезинде бо хөглүг программа уругларның хостуг үезин каастаптар кайгамчык белек болган.

Чуруктарны интернет четкизинден алган.