Буянныг чүректер.

''Тываның буянныг чүректери'' деп республиканың Аныяктар шимчээшкининиң идепкейжи кежигүннери пенсионер энениң дилээ-биле ооң дүжүдүн ажаажып бергеннер.

Күскү дүжүт ажаалдазы келгени-биле, чаа үениң ''тимуржулары'' ачы-буян чедирер ажылын уламчылап, дүжүт ажаалдазынга ылап-ла дуза негеттинип турар кижилерге дуза кадып эгелээннер.

''Свекла, картофель, укроп болгаш морковь. Бо огородтуң дүжүдү байлак болган - деп, Аныяктар шимчээшкининиң баштыңы Артыш Монгуш демдеглээн. - Чүгле харын 70 хар чеде берген Татьяна Ивановнага дүжүдүн ажаап алыры белен эвес айтырыг болу берген. Ынчангаш дүжүт ажаарынга дузалашпышаан, огородун аштап-арыглааш, кырган-аваның одаар ыяжын чарып бердивис''.
''Бо оолдар, уругларга дуза катканы дээш улуу-биле өөрүп четтирдим!'' - деп, Татьяна Ивановна чугаалааш, аныяктарны сүттүг шайы-биле ашкарып-чемгерген.

Идепкейлиг, эриг баарлыг бо аныяктар езулуг дуза хереглеп турар кижилерге ачы-буян чедиреринге кезээде белен. Шак бо кырган-аваны олар моон-даа соңгаар хайгаарап, карактаарлар.