Кызылдың Епархиязы найысылалдың чагыргазы-биле «Буянныг өг» деп төлевилелди боттандырып турар. Ооң кол сорулгазы – тодаргай чурттап турар чери чок кижилерни база өске-даа дуза хереглээннерни аъшкарып-чемгерер болгаш дуза чедирер ажылды организастаары.
Идик-хеп аймаа чыып салган хөй санныг баартактар улуг эвес садыг сагындырар, ынчалза-даа оларда өртектер бижиттинмээн болгаш садыгжы чок. Бо болза Воскресенскиниң кафедралдыг соборунда социал склад-тыр. Ында чыдар идик-хепти дуза хереглээннерге тодаргай доктааттынган хүнде халас үлеп турар. Шак ындыг ачы-дуза чедиреринче угланган социал ужур-дузалыг төлевилелдерни Кызылдың Епархиязы чаңгыс эвес удаа боттандырып турар.
«Неделяда ийи катап эки турачылар-биле кады хоорайның төп кезээнге дуза хереглеп турар кижилерни чемгерип турар бис. Соок үеде олар бут кырынга олуруп алгаш, дискектериниң кырынга чемни салып алгаш, эпчок байдалга чемненип турар. Ынчангаш шак ындыг дуза хереглээн кижилерге халас чемненип ап болур черни кылып бээрин шиитпирледивис. Кандыг-даа кижи берге байдалга таваржы берип болур. Ынчангаш дуза кадарынга белен бис. Ол бодалывысты боттандырарынга найысылалдың чагыргазы дуза кадарынга чөпшээрежип, хоорайның төп кезээнде, Рабочая кудумчузунда девискээрни аңгылап берди. Белеткел ажылдарын чорудуп эгеледивис» – деп, Кызылдың Епархиязының килдис удуртукчузу Дмитрий Шишкин чугаалаан.
Рабочая кудумчузунда “АбаканСтрой” деп садыгдан ырак эвесте девискээрге турар «Буянныг өгге” чүгле чынныр, чемненир эвес, а психолог, социал ажылдакчы дээн ышкаш өске специалистер база ажылдаары планда көрдүнген.
«Мындыг байдалга канчап чедип келгенин тодарадып, чугаалажыр бис. Ажылга тургустунуп алырынга база янзы-бүрү аарыг хамаарылгалардан адырлып алырынга база дузалажырынга белен бис. Бо хүнде черни дескилээр ажылдар чоруп турар. Өг иштинге чылыг шала турар» — деп, Кызылдың Епархиязының килдис удуртукчузу Дмитрий Шишкин дыңнаткан.
Амгы үеде Кызылдың Епархиязы чурттаар чери чок 50 хире кижини неделяда ийи катап төп рынок чанында чемгерип турар “Буянныг өгнү” келир чылын ажыдары планда көрдүнген.
Бистиң корр.
Чурукту интернет четкизинден хоолгалаан.
“Шын” №95 2024 чылдың декабрь 11