ОКТЯБРЬ 5 — БҮГҮ-ДЕЛЕГЕЙНИҢ БАШКЫ ХҮНҮ
Күстүң кайгамчык чараш, үнүш-бойдустуң янзы-бүрү өңнер-биле шиметтиниптер каас үези – октябрь 5-те бүгү делегей эң буянныг башкы мергежилдиглерниң хүнүн демдеглеп эрттирер. Бо байырлалдың тывылган төөгүзүн уктаар болза, улуг дыка ыравас. 1994 чылда ЮНЭСКО Бүгү-делегейниң башкы хүнүн демдеглээрин саналдаан. 1966 чылдың октябрь 5-те башкы кижиниң эргелериниң болгаш хүлээлгелериниң дугайында бир дугаар албан ёзузу-биле делегей чергелиг документ хүлээп алдынган. Шак ол хүнге тураскаадып, Бүгү-делегейниң башкы хүнүн октябрь 5-те кылдыр доктаадып каан. Ындыг-даа болза ол хүннү дыштаныр байырлал хүнү кылдыр чарлаваан. Эң эгезинде ССРЭ-ниң Дээди Совединиң Президиумунуң Чарлыы-биле Башкы хүнүн октябрь айның бир дугаар улуг-хүнүнде эрттирип чораан. 1980 чылда ол хүннү чурттуң байырлыг болгаш тураскаалдыг хүннериниң даңзызынче киирген. 1994 чылдан тура Башкы хүнүн бүгү делегей октябрь 5-те демдеглеп эгелей берген-даа болза, чамдык күрүнелерде, чижээ, Беларуссия биле Латвияда, октябрьның бир дугаар улуг-хүнү хевээр кылдыр артып алган. Чаңчыл ёзугаар ол хүн бүгү школаларда байырлыг шугум чыскаалдары, байыр чедириишкинниг концерттер, бот-башкарылга хүннери, культурлуг болгаш спортчу хемчеглер эртип турар. Шылгараан башкыларны шаңнап-мактаар байырлыг хуралдарны тус чер чагыргалары болгаш өөредилгеге хамаарылгалыг күүсекчи эрге-чагырга органнары эрттирип турар.
Надежда КУУЛАР.
Чурукту интернеттен алган: yandex.ru/images/sea...
“Шын” №38 2025 чылдың октябрь 2