Тыва Республиканың Дээди Хуралының депутады Эрес ХУУРАК:
– Республиканың Чазаа тускай шериг операциязының киржикчилерин база оларның өг-бүлелерин деткиириниң талазы-биле калбак ажылды чорудуп турар. Дайынчы оолдарның бүгү негелделерин болгаш чагыгларын долу хемчээлдиг күүседип турарын айыткан. Улуг ажылды тускай шериг операциязының киржикчилерин база оларның өг-бүлелерин деткиириниң талазы-биле тускай тургустунган чаңгыс аай штаб чорудуп турар. Ол ышкаш Россияның Президентизиниң даалгазы-биле «Ада-чурттуң камгалакчылары» күрүне фондузунуң салбырын ажыткан. Бистиң шериг албанныгларывыска гуманитарлыг дуза чедирилгезиниң ажылын эки деңнелде тургускан. Кончуг берге сорулгаларны күүседип турар бистиң оолдарга республиканың бүгү чурттакчыларының деткимчези, ажаанзыралы-дыр. Ай санында гуманитарлыг дузаламчыны ТШО-нуң шөлүнче чорудуп турар. Ол ышкаш республиканың удуртулгазының дилээн ёзугаар Президент В. Путинниң Чарлыы-биле 55-ки аңгы мото-адыгжы (даг) бригадага “гвардейжи” деп атты тыпсып, ооң бедик деңнелдиин бадыткаан. Оон аңгыда, күрүне Баштыңының шиитпири-биле Тывадан ийи шериг оолга Россияның Маадыры деп бедик атты тывыскан. Май айның барык эге хүннеринде оларга “Алдын Сылдыс” медальдарын тыпсыр.
“Шын” №32 2024 чылдың апрель 27