Тыва Республиканың Дээди Хуралының (парламентизиниң) Даргазы Каң-оол ДАВАА:
– Чоокку чылдарда республиканың мурнунда улуг сорулгалар турар, оларны боттандырарынга эрге-чагырганың бүгү деңнелдериниң сырый, демниг, тургузукчу кады ажылдажылгазы негеттинер. Тываның социал-экономиктиг байдалын дүрген базымнар-биле экижидериниң кол-кол херексел-чепсээн Тываның Баштыңы бодунуң чугаазында айытты. Ол болза социал-экономиктиг хөгжүлдениң амы-хууда программазы-дыр.
Ол ышкаш янзы-бүрү федералдыг программаларга республиканың идепкейлиг киржилгези болгаш боттуң программаларын боттандырары-дыр. Каттышкан регионалдыг продукт өскен, тудуг ажылдары 53,1 хуу, орук ажылдары барык 2 катап өзүлделиг, национал төлевилелдер талазы-биле көргүзүглер бедик. Бо бүгү чедиишкиннерни федералдыг деңнелге, ооң иштинде Россия Федерациязының адырлар аайы-биле яамыларынга база чугаалап турар. 2030 чылга чедир хөгжүлдениң Амы-хууда программазын узатканы-биле оон-даа улуг көргүзүглерни чедип алыр арга-шинек Тывада көстүп келген. Оон аңгыда, Моол-биле кызыгаарда чаарттынып турар эрттирилге чериниң чанынга онза экономиктиг девискээрни тургузарының төлевилели уламчылап турар. Сибирь регионнарының хөгжүлдезиниң чаа стратегиязын боттандырар апаар бис, ынаар Тывага хамаарышкан 30 ажыг хемчеглер кирип турар болгай.
Чурукту интернет четкизинден алган.
"Шын" №32 2024 чылдың апрель 27