Ренат Ондарның тиилелгези
Санкт-Петербургка апрель 12-де АСА 202 Лигазының тулган тиилекчизин илередир түңнел турнирге киржир эрге дээш маргылдаа бедик көдүрлүүшкүннүг болуп эрткен. Чартык түңнел оюнга эң чиик килдиг спортчулар Ренат Ондар (шола ады Бульдозер) биле таджик спортчу Осимхон Рахмонов ужурашканнар. Көрүкчүлер алгы кышкы-биле спортчуларны 3 раунд иштинде сонуургап деткээннер. Ренат Ондар эгезинден тура чүгле бурунгаар тиилелгеже чүткүлдүүн бадыткап, төнчүзүнге чедир туруштуун көргүскен. Түңнелинде ол тиилээш, түңнел оюнче үнгени тыва спортчуларга, аарыкчыларга улуг чоргаарал болган. Ренат аарыкчыларынга четтиргенин илереткен.
Спортчуга база тренерлеринге дараазында түңнел оюнга эки белеткелди база чүгле чедиишкинниг тиилелгени күзедивис.
Павел Пинигин аттыг маргылдааның тергииннери
Якутск хоорайда “Триумф” спорт ордузунга 1976 чылда Монреальга XXI Олимпий оюннарының чемпиону, 3 дакпыр делегей чемпиону П.П. Пинигинниң тиилелгезиниң 50 чыл оюнга тураскаадып, бүгү Россия база делегей чергелиг элээдилер аразынга хостуг хүреш маргылдаазы солун байдалга болуп эрткен.
Аңаа 12, 14, 16 хар чедир 3 бөлүкке 1235 мөге хүрешкен. Маргылдааның кол деткикчизи Якутияның “Демир орук” акционерлиг ниитилели болган.
Ол маргылдаага бистиң республикадан дараазында элээди мөгелер эки хүрежин көргүзүп, шаңналдыг черлерже киргеннер. Баштай бүгү Россия чергелиг маргылдаага 35 килге 1-ги черни Ай-Хаан Кара-оол база 3-кү черни Бай-Белек Ондар, 44 килге 3-кү черни Намзырай Ооржак, 48 килге 1-ги черни Эртине Кыргыс, 100 килден өрү спортчулар аразынга 1-ги черни Шойгу Сарыглар алганнар.
Дараазында делегей чергелиг маргылдаага 45 килге 2-ги черге
Санаа Сарыглар, 80 килге Балчиян Баажай чараш, дидим хүрешти көргүскеш, 3-кү черге төлептиг болган. Бо бичии мөге келир үеде шыырак спортчу болурун бадыткаан.
Бичии мөгелер, эр хейлер!
Красноярск хоорайда “Радуга” спорт өргээзинге апрель 9-11 хүннеринде Россияның алдарлыг тренери Э.В. Агафоновка тураскааткан 10, 13, 15 хар чедир назылыг оолдар аразынга дзюдо маргылдаазы болуп эрткен. Аңаа 1000 ажыг бичии дзюдоистер киришкен.
Түңнелинде шаңналдыг черлерже Кызылдың Олимп аттыг спорт школазындан 2-ги черлерни 55 килге Эчис Монгуш, 48 килге Анита Сат база 3-кү черге Семен Фалалеев төлептиг болганнар.
Бичии мөгелерге база тренер башкылары Сылдыс Анатольевич биле Синухет Олеговичиге изиг байыр.
Ай-Демир Монгуштуң чедиишкини
Апрель 11-12 хүннеринде Иркутск хоорайга Россияның маадыры Балдан Цыдыповка тураскааткан шеригжиткен шанчар, хүрежир хевирниң 4 дугаар бүгү Россия чергелиг маргылдаазы болуп эрткен. Аңаа 10-11, 12-13, 14-15, 16-17 харлыг 4 бөлүкке 300 хире оол киришкен.
Ол маргылдаага бистиң республикадан Ай-Демир Монгуш бодунуң килинге бүзүрелдии-биле 1-ги черни алгаш, маргылдааның тергиин спортчузу деп атка төлептиг болганы улуг чедиишкин.
“Баштайгы көш” маргылдаазы
Кызылдың 22 дугаар школазынга 1-2 класстың өөреникчилеринден тургустунган 12 команда аразынга солун, хөглүг шыдыраа маргылдаазы болуп эрткен.
Бо эртип турар оюн бүгү Россия чергелиг “Баштайгы көш” деп маргылдааның республика чергелиг чадазы болур. Маргылдааның кол сорулгазы — тиилекчи команда Сочиге болур түңнел оюнга киржир эргени алыры. Чурум ёзугаар маргылдааны республиканың Шыдыраа чөвүлели удуртуп эрттирген.
Нарын оюннарның түңнелинде Мария Аркадиевна Маадыр-оол биле Дуся Денеевна Ондарның белеткээни 22 дугаар школаның командазы 1-ги черни ап, тиилекчи атка төлептиг болганнар.
Команданың кежигүннери: Эрик Ондар, Самба Ондар, Антонина Маадыр-оол, Айше Ондар.
Ийи дугаар черже тренер башкы Арат Даш-оолович Ондарның белеткээни Чадаананың 1 дугаар школазының командазы кирген. Үшкү шаңналдыг черни тренер башкы Мария Аркадиевна Маадыр-оол биле сүмелекчи Мөңгүн-оол Дарын-оолович Түлүштүң белеткээни Кызылдың 15 дугаар лицейиниң командазы алганнар.
Маргылдааның тиилекчилеринге изиг байырны чедирип база түңнел оюннарга эки белеткелди, тиилелгени күзедивис.
/ Алексей ЧАМБАЛ-ООЛ,
спорттуң хоочуну.
Чуруктарны Тыва спорт каналдан база ТР-ниң Уругларның шыдыраа федерациязының социал четкиде арнындан алган.
“Шын” №14 2026 чылдың апрель 16