Каң-Демир Кууларның тиилелгези
Краснодарның Самбо аттыг спортчу өргээзинге июнь 1-3 хүннеринде самбога Россияның Чепсектиг Күштер яамызының чемпионады болуп эрткен. Аңаа ниитизи-биле Москва, Ленинград, Төп база Мурнуу, Чөөн чүк шериг девискээрлеринден 11 командадан 100 шыырак мөге хүрешкен. Маргылдааның кол сорулгазы – шериглерниң күш-шыдалын, дайынчы шынарын көдүрери база самбону сайзырадыры.
Маргылдааның ажыдыышкынынга Россияның Чепсектиг Күштериниң, Самбо чөвүлелиниң төлээлери база чалаткан аалчылар киришкен. Шеригжилер аразында бо маргылдаа, оларның күш-шыдал база угаан-медерел талазы-биле бедик туруштуг байдалының хыналдазын чорудары болуп турар.
Самбо – ССРЭ үезинде тывылган баштайгы хүреш. Хүрештиң сорулгазы – кижи бодун бүрүнү-биле камгалап билирин өөредири болуп турар. Ынчангаш шеригжилер бо хүрешти бирги черге салып, хөй чылдар иштинде белеткелди чорудуп, хөй маргылдааларга киржи- ри – хүлээлгези болуп турар. Чемпионаттың киржикчилеринге шеригниң тускай техника талазы-биле делгелгезин, спортчу мөөрейлерни ёзулуг байырлыг байдалга эрттиргени өөрүшкү, чоргаарал болган.
Чемпионаттың түңнелинде Улан-Удэ хоорайда өөренип турар бистиң чаңгыс чер чурттуувус Каң-Демир Куулар 64 килдиг мөгелер аразынга чараш хүрешти көргүзүп, 5 тиилелгелиг 1-ги черни ап, чемпион атка төлептиг болган.
Ёзулуг эр мөзү-шынарлыг хүрешти көргүскени дээш, мөгениң бодун болгаш ооң тренери Андрей Будажаповту Бурят Республиканың спорт сайыды Иван Козырев мактааш, байыр чедирген.
Пенсионерлер спартакиадазы
Кызылга 5 чыл аттыг стадионга июнь 29-та пенсионерлер спартакиадазы болуп эрткен. Спартакиаданың кол сорулгазы – “Кадык амыдыралче чүткүл” деп төлевилелди боттандырары.
Ачыр-дачыр тудушканының түңнелинде Чөөн-Хемчик кожууннуң найыралдыг командазы 1-ги черни алган. База 2-3-кү черлерни Кызыл биле Ак-Довурак хоорайларның командалары алганнар.
Сибирьниң интеллектуалдары
Новосибирск хоорайга июнь 29-тан июль 6-га чедир “Сибирьниң интеллектуалдары”, “Эртем хоорайы Кольцово – 2026” деп Бүгү-россия чергелиг шыдыраа маргылдаазы болуп эрткен. Аңаа бистиң республикадан Сергей Түлүш башкының удуртулгазы-биле 9 хардан 15 хар чедир оолдар, уруглар киришкеннер.
Маргылдааның кол сорулгазы – Россияның бирги черинге киржир шыырак ойнаар оолдар, уругларны илередири.
Ол маргылдаага бо удаада чүгле Анастасия Ооржак 5-ки черге төлептиг болган.
Солун медээ
Бо хонуктарда мурнуу Кореядан угаан сайзырадыр даштар-биле ойнаар оюн Гонуң мастери (эң бедик 6 дугаар дан) Mr. Chang Hyukkoo аалдап келген.
Мастерниң келген кол сорулгазы – эрткен чылын келгеш, чоруткан өөредилге харылзааларын уламчылаары.
Ол келгеш, тренерлер база шыырак ойнакчылар аразынга мастер-классты эрттирген. Ол боду Тываның бойдузунуң чаражын сонуургап ынакшаан болуп турар. Оон аңгыда Кореяның культуразын таныштырып база катап маргылдааларга барып киржирин сүмелээн. Бистиң тренерлеривис база ойнакчыларывыс эрткен чылын Кореяга болган маргылдаага улуг дуза чедиргени дээш, мастерге өөрүшкүзүн илереткеннер.
/ Алексей ЧАМБАЛ-ООЛ, спорттуң хоочуну.
Чуруктарны “Тыва спорт” каналдан, ТР-ниң Спорт яамызының социал четкиде арнындан алган.
“Шын” №26 2026 чылдың июль 9
"Шын" солуннуң МАХ-каналынга каттыжыңар: max.ru/join/egenQ...