Делегейде улуг сайзыралды алган компьютер оюннары Тывада база кончуг шалыпкын сайзырап, дыка хөй аныяктарның кичээнгейин хаара туда берген.
Июнь 11-де «Киберспорттуң лидерлери» деп Россияда болуп эртип турар өөредилге-чырыдыышкынныг аныяктар шуулганынга даянгаш, Тывага Киберспорттуң хүнүн демдеглээн.
Хемчегге киржип келген аныяктар киберспорттуң эксперттери-биле ужуражып, арга-дуржулганы ап, кайгамчык солун лекцияларны дыңнаар.
«Киберспорт-биле ойнап турар аныяктарга бөгүн солун болуушкун болуп тур. Киберспорт хүнү деп хемчегни Тывада бир дугаар эрттирип турарывыс бо. 18-тен 25 харга чедир аныяк оолдар, уруглар мында чыглып келди.
Аныяктарны шын орукче углап, үен-даян херекчок шимчээшкиннер кылбазын дээш, Киберспорттуң федерациязын үндезилээн бис. Чүгле компьютерге оюннар эвес, а өске-даа хөй-ниитижи ажылдарны организастап турар бис. Ажыы-биле чугаалаарга, аныяктарның кичээнгейин хаара тудар сорулгавыс ол. Өөредилгезинде кайы хире чедиишкиннер барыл, хөй-ниити ажылдарга киржилгези кандыгыл дээш шуптузун өөренип көрген соонда, Россия чергелиг улуг маргылдааларже чоруур эргени чаалап алыр.
Россияның Киберспорт федерациязының Тывада салбыры 2021 чылда ажыттынарга, оон эгелээш-ле ажылдап эгеледивис. Тываның киберспортчулары 3 чыл улаштыр Россияның 8 шыырак командазынче кирип тур. Россияның девискээринде 500 ажыг муң кижи профессионалдыг киржип турар болза, анаа сонуургап ойнап турар улустуң саны 37 сая чедип турар. Ынча көвей кижилерниң аразындан Тыва 8 шыырак команданың аразында дээрге, дыка улуг чедиишкин-дир ийин» – деп, Россияның Киберспорт федерациязының Тывада салбырының даргазы, хууда сайгарлыкчы Чаян Доржу чугаалады.
Россияга болган киберспорт маргылдаазынга 8 шыырак команданың аразынче кирген оолдар Тывада чедип келген. Оларны уткуп, деткип байырлаары ол. Аңаа чыл дургузунда ук спорттуң маргылдааларынга бодун эки көргүскен аныяктарга шаңналдар тыпсыры планда көрдүнген.
Тываның «Мөгелер» деп киберспортчулар командазында 5 кижи бар. Келир үеде черле сула салдынмайн, бурунгаар чүткүүрүн аныяктар планнап турар. Тываның командалары чүгле Россияның эвес, а бүгү делегейге эң-не шыырак командалар болу бээринге Чаян Доржу бүзүреп турар.
«Тыва иштинге маргылдааларга киржикчилерниң саны 500-тен черле эвээжевес чорду. Маргылдаага онлайн хевирге ойнап болур болгаш киржикчи саны ол хире чеде бээр деп бодаар-дыр мен» – деп, Чаян немеди.
Киберспорт төвүнде ниитизи-биле 5 тергиин (вип) болгаш 2 бөдүүн дерилгелиг өрээлдер бар. Ниитизи-биле төпте 55 компьютер бар.
Айдың ОНДАР.
Авторнуң тырттырган чуруу
"Шын" №43 2024 чылдың июнь 12
Чүгле Россияга эвес, бүгү делегейге шылгараар дээш…
13 июня 2024
34